वीरगंज महानगरपालिका–१६ नगवास्थित ब्रम्हाबाबा टोलका बासिन्दा विगत पाँच वर्षदेखि दुर्गन्धको समस्याले पीडित बनेका छन् ।
लामो समयदेखि समस्या भोग्दै आए पनि समाधानका लागि ठोस पहल नभएको भन्दै स्थानीयवासीले गुनासो गरेका छन् । स्थानीयवासीका अनुसार टोलमा फैलिने दुर्गन्धका कारण दैनिक जनजीवन प्रभावित भएको छ । दुर्गन्ध सहेर बस्नुपर्ने बाध्यता रहेको बताउँदै उनीहरूले आफूहरूलाई ‘नर्कमा बसेको अनुभूति भइरहेको’ बताएका छन् ।
समस्या समाधानका लागि पटक–पटक सम्बन्धित निकायको ध्यानाकर्षण गराउँदा पनि सुनुवाइ नभएको स्थानीयको गुनासो छ । उनीहरूका अनुसार वीरगंज महानगरपालिकाका पूर्वमेयर विजयकुमार सरावगी र वर्तमान मेयर राजेशमान सिंहको कार्यकालमा समेत समस्या समाधानका लागि प्रभावकारी पहल हुन सकेको छैन । सम्बन्धित वडा अध्यक्षलाई पटक–पटक जानकारी गराउँदा पनि समस्या ज्यूँका त्यूँ रहेको उनीहरूको आरोप छ ।
वर्षौंदेखि एउटै समस्या झेल्नुपर्दा स्थानीयवासी निराश बनेका छन् । दुर्गन्धका कारण वातावरण प्रदूषित हुनुका साथै स्वास्थ्यमा समेत असर पर्न सक्ने भन्दै उनीहरूले चिन्ता व्यक्त गरेका छन् ।
स्थानीयवासीले वीरगंज महानगरपालिका र वडा कार्यालयसँग तत्काल स्थलगत अनुगमन गरी दुर्गन्धको कारण पहिचान गर्न तथा समस्याको स्थायी समाधान गर्न माग गरेका छन् ।
पाँच वर्षदेखि दुर्गन्धको समस्या झेलिरहेका नगवाका बासिन्दाले कहिलेसम्म यस्तो अवस्थामा बस्नुपर्ने हो भन्ने प्रश्न उठेको छ । महानगरपालिका र सम्बन्धित वडा कार्यालयले स्थानीयको गुनासो सम्बोधन गर्दै समस्या समाधानका लागि कहिले ठोस कदम चाल्छन् भन्ने चासो बढेको छ ।
