पर्साको बसन्तपुरमा रहेको गादीमाई साझेदारी वन उपभोक्ता समूहका अध्यक्ष सहरुम राउत गद्दीले छठ पर्वपछि १० हजार वनका बिरुवा वितरण गर्ने प्रतिबद्धता व्यक्त गरेका छन् ।
गादीमाई साझेदारी वन उपभोक्ता समूहको तेस्रो वार्षिक साधारण सभालाई सम्बोधन गर्दै अध्यक्ष गद्दीले वन संरक्षण तथा हरियाली प्रवर्द्धनका लागि उपभोक्तालाई निःशुल्क बिरुवा वितरण गर्ने योजना रहेको बताएका हुन् ।
उनले बिरुवा वितरण गर्नु मात्र पर्याप्त नभई त्यसको संरक्षण र उचित व्यवस्थापन पनि आवश्यक रहेको बताए। विगतमा विभिन्न स्थानमा वनका बिरुवा वितरण गरिए पनि धेरैले तिनको संरक्षणमा ध्यान नदिएको उल्लेख गर्दै यसपटक वितरण गरिने बिरुवाको संरक्षणमा उपभोक्ताले विशेष ध्यान दिने विश्वास व्यक्त गरे ।
गद्दीका अनुसार छठपछि सुरु गरिने अभियानअन्तर्गत पर्साका विभिन्न गाउँ, टोल तथा बस्तीमा १० हजार वनका बिरुवा वितरण गर्ने लक्ष्य राखिएको छ । उनले आफ्नो कार्यकालको तेस्रो वर्षसम्म वन संरक्षण तथा वृक्षरोपण अभियानलाई थप विस्तार गर्ने योजना रहेको पनि बताए ।
कार्यक्रममा अध्यक्ष गद्दीले आफूलाई जिम्मेवारीमा पुर्याउने उपभोक्ताको विश्वास कायम राख्दै इमानदारीपूर्वक काम गर्ने प्रतिबद्धतासमेत व्यक्त गरे। आफूबाट कुनै त्रुटि भए कानुनअनुसार जिम्मेवारी लिन तयार रहेको उल्लेख गर्दै उपभोक्ताको प्रतिष्ठा र विश्वासमा आँच आउन नदिने उनको भनाइ थियो ।
उनले उपभोक्ताको साथ र सहयोगले आफूलाई थप हौसला मिलेको बताउँदै आगामी दिनमा पनि वन संरक्षण, वृक्षरोपण तथा जनहितका काममा सक्रिय रहने प्रतिबद्धता जनाए ।
गादीमाई साझेदारी वन उपभोक्ता समूहको तेस्रो वार्षिक साधारण सभा बसन्तपुर, पर्सामा आयोजना गरिएको थियो । कार्यक्रममा मधेस प्रदेशका वन तथा वातावरणमन्त्री शंकरप्रसाद चौधरी प्रमुख अतिथिका रूपमा सहभागी भएका थिए ।
त्यसैगरी, मधेस प्रदेशका भूमि व्यवस्था, कृषि तथा सहकारीमन्त्री श्यामप्रसाद पटेल, जिल्ला समन्वय समिति पर्साका संयोजक अजय सर्राफ, जिराभवानी गाउँपालिका अध्यक्ष अनुज चौधरीसहित वन तथा सुरक्षा निकायका अधिकारीहरूको उपस्थिति रहेको थियो ।
.jpg)
.jpg)
.jpg)
.jpg)
.jpg)
.jpg)
