सप्तकोसी नगरपालिका–५ गङ्गाजलीमा बिहीबारदेखि प्रथम मेयर कप क्रिकेट प्रतियोगिता सुरु भएको छ । नगर खेलकुद विकास समिति सप्तरीको मुख्य आयोजना तथा गङ्गाजली मित्र युवा क्लब वडा नं. ५ को सह–आयोजनामा प्रतियोगिता सुरु गरिएको हो ।
प्रतियोगितामा सप्तरी र उदयपुर जिल्लाका गरी ८ टिमको सहभागिता रहेको छ । उद्घाटन खेलमा आयोजक ए टिमले बेलका क्रिकेट क्लब उदयपुरलाई पराजित गर्दै विजयी शुरुवात गरेको छ। आयोजक ए टिमले निर्धारित २० ओभरमा ७ विकेट गुमाउँदै २३९ रन बनायो। जवाफी ब्याटिङमा उत्रिएको बेलका टिमले १४.२ ओभरमा सम्पूर्ण विकेट गुमाउँदै ११८ रन मात्र बनाउन सक्यो ।
प्रतियोगिता जेठ २० गतेसम्म सञ्चालन हुनेछ। प्रतियोगिताका विजेता टिमलाई नगद ५० हजार र उपविजेता टिमलाई ३० हजार रुपैयाँ प्रदान गरिने आयोजक समितिले जनाएको छ ।
प्रतियोगिताको उद्घाटन कार्यक्रम नगर खेलकुद समिति अध्यक्ष सुरज खड्काको अध्यक्षता तथा नगरप्रमुख कृष्ण ढकालको प्रमुख आतिथ्यमा सम्पन्न भएको हो। कार्यक्रममा स्थानीय जनप्रतिनिधि, समाजसेवी र खेलप्रेमीहरूको उल्लेखनीय उपस्थिति रहेको थियो ।
