वीरगंज महानगरपालिकाको बोर्ड बैठक ८ महिनादेखि नबसी मेयर राजेशमान सिंहले एक्लै निर्णय गर्दै काम अगाडि बढाउँदै आएका छन् ।
नगरका महत्त्वपूर्ण नीतिगत निर्णयहरू बोर्डको अनुमोदनबिना अघि बनाइँदा वडा अध्यक्षहरू असन्तुष्ट बनेका छन् । नगरपालिकाको सबैभन्दा ठूलो सामूहिक निर्णय गर्ने निकाय — बोर्ड बैठक — गत आठ महिनादेखि बस्न सकेको छैन् । यसले योजनाको स्वीकृति, बजेट निर्माण र नीति निर्धारणमा असमझदारी बढाएको छ । वडा अध्यक्षहरूले मेयर सिंहमाथि व्यक्तिगत मनपरी गरेको आरोप लगाउदै आएकाे छ ।
बोर्ड बैठक विनै चिल्ड्रेन पार्कको नाम परिवर्तन
हालै मेयर सिंहले नगर क्षेत्रभित्रको चिल्ड्रेन पार्क को नाम बोर्ड बैठकबाट स्वीकृति नलिई शङ्खधर शाख्वा पार्क राखेर उदघाटन गरेका छन् । नगरपालिकाका स्रोतका अनुसार उक्त निर्णय पूर्णतः एकल हो र यसबारे बोर्डलाई जानकारीसम्म दिइएको छैन् । एक वडा अध्यक्षले भने, राष्ट्रिय विभुतिलाई समेत एकल जातकाे पार्क नामकरण गरिएको छ । कार्यक्रममा सहभागि हुँदा सम्पूर्ण समुदायकाे राष्ट्रिय विभूतिकाे नामकाे पार्कमा केवल नेवारी समुदायको पहिचान सहितको कार्यक्रम गरिएकाे थियाे । यसले मेयर सिंहकाे जातियतालाई बढावा दिन्छ ।
वडाध्यक्षहरू असन्तुष्ट, योजनाको भुक्तानी रोकिँदा थप आक्रोशित
कतिपय योजनाका रकम समयमा भुक्तानी नहुँदा वडा अध्यक्षहरू खुल्ला रूपमा आलोचना गर्न थालेका छन् । प्रमुख प्रशासकीय अधिकृत अरविन्दलाल कर्ण र मेयरसिंह माथि कार्यसम्पादनमा लापरवाही र निर्णय प्रक्रियामा अपारदर्शिता भएको आरोप लगाउँदै वडाध्यक्षहरू बिच्किएका छन् ।
वडा सदस्य फकाउन सक्रिय
बोर्ड बैठक बस्न नसक्दा बजेट निर्माण प्रक्रिया पनि प्रभावित भएको छ । यस्तो अवस्थामा मेयर सिंह आफैँ र उनका कार्यकर्ता मार्फत वडा सदस्यहरूलाई व्यक्तिगत रूपमा भेटेर "सम्झाउने" र समर्थन जुटाउने प्रयासमा सक्रिय भएको स्रोतले जनाएको छ । तर वडा अध्यक्षहरूको बहुमत उनको कार्यशैलीसँग असहमत देखिन्छ । वडा सदस्यहरूलाई प्रलोभन दिएर फकाउन थालेका छन् ।
संविधान र स्थानीय सरकार सञ्चालन ऐन अनुसार पालिकाको समग्र नीति, बजेट तथा निर्णयहरू बोर्ड बैठक मार्फत अनुमोदन हुनुपर्ने व्यवस्था छ । तर वीरगंज महानगरपालिकामा ८ महिनासम्म बोर्ड बैठक नबसी सबै निर्णय मेयरको कार्यालयबाट हुँदै आएकोले कानुनी वैधता र पारदर्शिता दुवैमा प्रश्न उठेको छ ।
