राष्ट्रिय स्वतन्त्र पार्टी (रास्वपा)ले पार्टी सभापति रवि लामिछानेको समर्थनमा सञ्चालन गरिएको हस्ताक्षर अभियानमा हालसम्म २४ लाख ५७ हजार ६ सय १८ जनाको हस्ताक्षर संकलन भएको जनाएको छ ।
पार्टीको केन्द्रीय कार्यालयमा बिहीबार आयोजित पत्रकार सम्मेलनमा रास्वपा नेता तथा अभियान संयोजक दीपक बोहराले उक्त विवरण सार्वजनिक गर्दै अभियानलाई अझ सशक्त बनाउने तयारी भइरहेको जानकारी दिए ।
उनका अनुसार, असार ७ गतेदेखि सुरु गरिएको यो अभियान पार्टी सभापति लामिछानेमाथि सरकारले राजनीतिक प्रतिशोध साँध्न खोजेको आरोपसहित सुरु गरिएको हो । अभियानलाई विस्तार गर्दै अब साउन ५ गतेदेखि देशव्यापी घरदैलो कार्यक्रम पनि सञ्चालन गरिने उनले बताए ।
बोहराले केन्द्रीय कार्यालय, प्रदेश, सीमा नाका तथा विदेशमा समेत बुथ राखेर हस्ताक्षर संकलन अभियानलाई थप व्यापक बनाइने जानकारी दिए । साथै, अभियान सञ्चालनका लागि हालसम्म ४६ लाख १२ हजार ६ सय ३७ रुपैयाँ सहयोग संकलन भएको उनले बताए ।
पत्रकार सम्मेलनमा उनले हालसम्म सभापतिको अपिल र हस्ताक्षर फारम छाप्ने लगायतका कार्यमा ५९ लाख ६८ हजार रुपैयाँ खर्च भइसकेको पनि उल्लेख गरे । यसबाट अभियानमा ठूलो मात्रामा आर्थिक स्रोत परिचालन भएको स्पष्ट भएको छ ।
रास्वपाले आफ्ना सभापतिमाथि न्याय नभएको र सरकारले फसाउन खोजेको आरोप लगाउँदै जनसमर्थन बटुल्ने प्रयास गरिरहेको छ । हस्ताक्षर अभियान र घरदैलो कार्यक्रमले लामिछाने प्रकरणलाई राजनीतिक मुद्दाको रूपमा सशक्त बनाउने देखिएको छ ।
