सिप्रबी सेक्युरिटिजका महाप्रबन्धक जयन्त श्रीवास्तव ठगी आरोपमा हिरासतमा रहेकाे केही दिनपछि रिहा भएका छन् ।
साढे ११ करोड रुपैयाँ ठगी आरोपमा उनीमाथि परेको जाहेरीकाे अनुसन्धानपछि प्रहरीबाट निर्दोष ठहरिएर आज हिरासत मुक्त भएका हुन् ।
श्रीवास्तवले आफूलाई बदनाम गर्न नियोजित रूपमा उजुरी दायर गरिएको दाबी गरेका छन् । उनका अनुसार, आफूविरुद्ध उजुरी परेको जानकारी पाएपछि स्वेच्छिक रूपमा अनुसन्धानका लागि गत बुधवार जिल्ला प्रहरी परिसर काठमाडौं, भद्रकालीमा हाजिर भएका थिए । प्रहरी अनुसन्धानका क्रममा तीन दिनको म्याद थप गरी थुनामा राखिएको थियो ।
"म प्रहरीमा आफैँ उपस्थित भएँ, अनुसन्धानमा कुनै त्रुटि नदेखिएकाले प्रहरीसँग स्पष्ट भएपछि छुटेको हुँ," श्रीवास्तवले बताए । उनले जाहेरीकर्ताहरू मिता मुररका अग्रवाल र ज्योति अग्रवाल आफ्नो ग्राहक नै नभएको स्पष्ट पारे ।
"उनीहरू सिप्रबी सेक्युरिटिजमार्फत कुनै कारोबार नगरेका हुन्, ग्राहक कोडसमेत छैन," उनले दाबी गरे, "उनीहरू आफैँ फरार छन् र बदनाम गर्ने नियतले मात्र यस्तो आरोप लगाइएको हो ।"
श्रीवास्तवविरुद्ध उजुरीकर्ताहरूले आफूहरूले पाउनु पर्ने ११ करोड ५५ लाख रुपैयाँ नपाएको भन्दै जाहेरी दिएका थिए। तर श्रीवास्तवका अनुसार ती व्यक्तिहरू कम्पनीसँग सम्बन्धित नै छैनन् ।
यस प्रकरणमा प्रहरीले हालसम्म कुनै ठोस प्रमाण फेला नपरेको भन्दै उनलाई रिहा गरेको हो । प्रहरीले भने अनुसन्धान जारी रहेको जनाएको छ ।
