प्रहरीले हेटौँडाबाट साढे ४२ किलो लागूऔषध गाँजासहित दुई भारतीय नागरिकलाई पक्राउ गरेको छ ।
पथलैया–हेटौँडा सडकखण्डअन्तर्गत हेटौँडा उपमहानगरपालिका–१५, पिपलबोटमा भारतीय गाडी रोकेर जाँच गर्ने क्रममा गाँजा बरामद भएको प्रहरीले जनाएको छ ।
पक्राउ पर्नेमा भारतको वैशाली जिल्लास्थित महुवा टोलका २५ वर्षीय बिर्जुकुमार राय र सोही स्थानका २६ वर्षीय मन्जयकुमार राय रहेका छन् । उनीहरू भारतीय गाडीमा सवार थिए ।
प्रहरीका अनुसार मंगलबार दिउँसो हेटौँडा बजारबाट पथलैयातर्फ जाँदै गरेको बीआरआई एपी ६०७३ नम्बरको गाडी जाँच गर्ने क्रममा चालकको सिटमुनि फल्स बटम बनाएर लुकाइएको अवस्थामा गाँजा फेला परेको हो ।
गाडीको फल्स बटमभित्र प्लास्टिकले प्याक गरिएका १९ पोका गाँजा फेला परेको प्रहरीले जनाएको छ। बरामद गाँजाको तौल साढे ४२ किलोग्राम रहेको छ ।
प्रहरीले गाँजासहित भारतीय गाडी र दुवै जनालाई नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ ।
