सशस्त्र प्रहरी बल नं. १२ गण बाराका गणपति तथा प्रहरी उपरीक्षक (एसपी) खुमबहादुर केसीको निर्देशनमा सिमानामा कडा निगरानीपछि शनिबार मात्रै करिब पाँच लाख रुपैयाँ बराबरको अवैध सामान बरामद गरिएको छ ।
जितपुर सुरक्षा वेशको मोबाइल टोलीले पथलैया–हेटौंडा सडकखण्डस्थित अमलेखगञ्जमा गाडी चेकजाँच गर्ने क्रममा करिब २ लाख ६७ हजार रुपैयाँ बराबरको कपडा र किराना सामग्री बरामद गरेको सशस्त्र प्रहरीले जनाएको छ ।
त्यस्तै, सिम्रौनगढ नगरपालिका–३ झरोखर सीमा क्षेत्रमा सीमा सुरक्षा गुल्म पिपरपातीको टोलीले मोटरसाइकलसहित करिब २ लाख रुपैयाँ बराबरको किराना सामान बरामद गरेको छ ।
यसैगरी, बीओपी कबैगोठले सुवर्णपुर गाउँपालिका–३ संतगञ्ज सीमा इलाकाबाट करिब ४० हजार रुपैयाँ बराबरको मोटर पार्ट्स बरामद गरेको जनाएको छ ।
बरामद गरिएका सबै सामान आवश्यक कानुनी कारबाहीका लागि वीरगञ्ज भन्सार कार्यालयमा बुझाइएको एसपी केसीले जानकारी दिए ।
उनका अनुसार साउन महिनामा मात्रै करिब ९० लाख र भदौ महिनाको अहिलेसम्म करिब ४० लाखसहित करिब १ करोड १० लाख रुपैयाँ बराबरका अवैध सामान बरामद गरिएका छन् । तीमध्ये रेडिमेड कपडा, कम्प्युटर पार्ट्स, कुर्ता–सुरुवाल, जुत्ता तथा करिब ३२ किलो लागूऔषध (गाँजा) पनि रहेका छन् ।
एसपी केसीले बारामा रहेका मातहतका सम्पूर्ण युनिट इन्चार्जलाई सिमानामा विशेष निगरानी र कडा चेकजाँच गर्न निर्देशन दिइसकिएको बताए । उनको नेतृत्वमा सीमाक्षेत्रमा चेकजाँच प्रणाली अझ कडाइ गरिएको छ ।
