वीरगंज महानगरपालिकाले सञ्चालन गर्दै आएको जनस्वास्थ्य प्रयोगशाला (ल्याब) ले सेवा विस्तार गर्दै आइतबारदेखि थप १५ प्रकारका स्वास्थ्य जाँच सेवा सुरु गरेको छ ।
यसअघि ५५ प्रकारका परीक्षण मात्रै हुँदै आएको ल्याबमा अब कुल ७० प्रकारका स्वास्थ्य सेवा उपलब्ध हुने भएका छन् । महानगरपालिका वडा नं. ३ मालपोत चोकमा रहेको प्रयोगशालामा मेयर राजेशमान सिंहले नयाँ सेवाको शुभारम्भ गरेका हुन् ।
ल्याबकी इन्चार्ज राधिका कुमारी गुप्ताका अनुसार नयाँ सेवा थपिएसँगै अब बिरामीहरू जाँच नपाएर फर्किनुपर्ने बाध्यता समाप्त भएको छ ।
थाइराइडदेखि बी–१२ सम्मका नयाँ परीक्षण
आइतबारदेखि सुरु गरिएका १५ परीक्षण सेवामा थाइराइड, भिटामिन बी–१२, एचएस–सीआरपी, टीएसएचलगायतका महत्वपूर्ण तथा बढी माग हुने स्वास्थ्य परीक्षण समावेश छन् ।
गुप्ताले भनिन्, “पहिले यी परीक्षण उपलब्ध नहुँदा धेरै बिरामीहरू बाहिरका निजी ल्याबमा जान बाध्य हुन्थे, अब भने सबै सेवा यहीँ उपलब्ध हुनेछ ।”
सस्तोमा गुणस्तरीय सेवा
वीरगन्ज महानगरपालिकाले २०८० असोज २८ गतेदेखि नगरवासीलाई सस्तो, भरपर्दो र गुणस्तरीय परीक्षण सेवा उपलब्ध गराउने उद्देश्यले आफ्नै जनस्वास्थ्य ल्याब सञ्चालनमा ल्याएको हो ।
प्रमुख प्रशासकीय अधिकृत अरविन्दलाल कर्णका अनुसार महानगरको ल्याबमा उपलब्ध परीक्षण शुल्क बजारका निजी ल्याबभन्दा ७५ प्रतिशतसम्म सस्तो छ ।
उनका अनुसार,
- सीबीसी परीक्षण : १७५ रुपैयाँ
- लिभर फंक्शन टेस्ट : २०० रुपैयाँ
- लिपिड प्रोफाइल टेस्ट : ३०० रुपैयाँ
निजी ल्याबहरूले यी परीक्षणका लागि ७०० देखि १००० रुपैयाँसम्म लिने गरेको पाइन्छ ।
त्यस्तै, निजी ल्याबमा करिब १,२०० रुपैयाँ पर्ने थाइराइड परीक्षण महानगरको ल्याबमा ५५० रुपैयाँ मै उपलब्ध छ ।
विशेष समूहका लागि छुट
महानगरका अनुसार स्वास्थ्य ल्याबमा
- जेष्ठ नागरिक (बृद्द भत्ता पाउने)
- मृगौला पीडित
- क्यान्सर पीडित
- एचआईभी संक्रमित
- सहिद परिवार
- मधेस आन्दोलनका घाइते
- विपन्न परिवार
लाई सबै प्रकारका परीक्षणमा ९० प्रतिशत छुट, तथा अपांगता भएका व्यक्तिलाई ५० प्रतिशत छुट उपलब्ध गराइन्छ ।
चार स्थानमा नमूना संकलन केन्द्र खोलिँदै
बढ्दो सेवा मागलाई ध्यानमा राख्दै महानगरले चाँडै नै चार स्थानमा नमूना (मल, पिसाब) संकलन केन्द्र स्थापना गर्ने तयारी गरिरहेको महानगरले जनाएकाे छ ।
दुई वर्षमा २२ हजारभन्दा बढीले सेवा लिए
ल्याबकी इन्चार्ज राधिका कुमारी गुप्ताका अनुसार २०८० असोज २८ देखि २०८२ मंसिर ६ गतेसम्म कुल २२ हजार ५१६ जनाले ल्याबको सेवा लिएका छन् ।
