पर्सामा १५ लाख रुपैयाँ हुण्डीसहित एकजना पक्राउ, मोटरसाइकलको लेगगार्डबाट रकम बरामद

स्थानीय

Home
स्थानीय
पर्सामा १५ लाख रुपैयाँ हुण्डीसहित एकजना पक्राउ, मोटरसाइकलको लेगगार्डबाट रकम बरामद

पर्सामा १५ लाख रुपैयाँ हुण्डीसहित एकजना पक्राउ, मोटरसाइकलको लेगगार्डबाट रकम बरामद

वीरगंज सिटी सोमबार, मंसिर ८, २०८२

पर्सामा स्रोत नखुलेको १५ लाख रुपैयाँ हुण्डी रकमसहित एक व्यक्ति पक्राउ परेका छन् ।

विशेष सूचनाका आधारमा जिल्ला प्रहरी कार्यालय पर्साको मातहत प्रहरी चौकी धोरे र सशस्त्र प्रहरी बल नेपालको टोलीले संयुक्त रूपमा गरेको चेकजाँचका क्रममा रकम बरामद गरेको हो । पर्साका प्रहरी नायब उपरिक्षक हरि बहादुर बस्नेतका अनुसार आइतबार दिउँसो करिब १४:३० बजे पकाहामैनपुर गाउँपालिका–१ धोरे चेकप्वाइन्ट नजिकै चेकजाँच भइरहेको बेला BR22AF4126 नम्बरको मोटरसाइकल रोकेर चेकजाँच गर्दा लेगगार्डमा लुकाइएको ठुलो परिमाणको रकम फेला परेको हो ।

मोटरसाइकलमा सवार पकाहामैनपुर–१ निवासी ३४ वर्षीय अवधेश पटेललाई नियन्त्रणमा लिइएको प्रहरीले जनाएको छ ।

उनले बोकेको झोलामा

रु १,००० दरका ७९० थान — रु ७,९०,०००
रु ५०० दरका १,३०१ थान — रु ६,५०,५००
रु १०० दरका ५६९ थान — रु ५६,९००
रु ५० दरका ५० थान — रु २,५००
रु २० दरका ५ थान — रु १००

गरी जम्मा रु १५,००,००० (पन्ध्र लाख रुपैयाँ) बरामद भएको प्रहरीले जनाएकाे छ ।

बरामद गरिएको नगद कालो प्लास्टिकमा बेरिएको अवस्थामा ‘पंकज मसाला’ लेखिएको झोलाभित्र लुकाइएकाले रकम वैध हो वा अवैध कारोबारका लागि ल्याइएको हो भन्नेबारे शंका उत्पन्न भएको प्रहरीले बताएको छ ।

उक्त घटनामा प्रयोग भएको मोटरसाइकल समेत बरामद गरी पटेललाई नियन्त्रणमा लिएर मुलुकी अपराध संहिता, २०७४ को दफा १२५(क) अनुसार हुण्डी कारोबार सम्बन्धी कसुरमा अनुसन्धान थालिएको जिल्ला प्रहरी कार्यालय पर्साले जनाएको छ ।

प्रहरीले यस घटनालाई सीमावर्ती क्षेत्रमा बढ्दै गएको अवैध वित्तीय कारोबार (हुण्डी) नियन्त्रणतर्फको महत्वपूर्ण सफलताका रूपमा लिएको छ ।
यसअघि पनि वीरगंज आसपासका क्षेत्रमा पटक–पटक हुण्डी रकमसहित व्यक्तिहरू पक्राउ पर्दै आएको छ ।