सशस्त्र प्रहरी बल नेपाल नं. १२ गण हेडक्वाटर, बाराका गणपति तथा सशस्त्र प्रहरी उपरीक्षक (एसपी) खुमबहादुर के.सी.ले आफ्नो एक वर्षे कार्यकालमा बारा जिल्लामा उल्लेखनीय उपलब्धि हासिल गर्नुभएको छ । सीमा सुरक्षा सुदृढीकरण, तस्करी तथा अन्तर–सीमा अपराध नियन्त्रणमा उहाँको नेतृत्व प्रभावकारी देखिएको छ ।
एसपी के.सी.ले देखाउनुभएको कार्यक्षमता, नेतृत्वदक्षता र नतिजामूलक कार्यको उच्च मूल्याङ्कन सशस्त्र प्रहरी बल नेपालले समेत गरेको छ । उहाँले सम्पादन गर्नुभएको कामको आधारमा देशभरका ४४ गणमध्ये उत्कृष्ट नतिजासहित पहिलो स्थान हासिल गर्न सफल हुनुभएको हो ।
एसपी के.सी.को नेतृत्वमा बाराको सीमा सुरक्षा प्रणाली थप सुदृढ र प्रभावकारी बनेको छ । सीमावर्ती क्षेत्रमा हुने अवैध ओसार–पसार, तस्करी तथा अन्य अन्तर–सीमा अपराध नियन्त्रणमा उल्लेखनीय सफलता प्राप्त भएको सशस्त्र प्रहरी बलले जनाएको छ । सशस्त्र प्रहरी महानिरीक्षक राजु अर्यालले लागू गर्नुभएको ‘गण प्रथम गराउने गणपतिलाई पुरस्कारस्वरूप अर्को गणको कमाण्ड दिने’ नीतिअनुसार एसपी के.सी.को सरुवा भइसकेको छ ।
नियमित निगरानी र सूचनामा आधारित कारबाहीका कारण सुरक्षा चुनौतीहरू न्यूनिकरण भएका छन् । विपद् व्यवस्थापनको क्षेत्रमा समेत उहाँको कार्यकाल उदाहरणीय रह्यो । प्राकृतिक विपद्का समयमा सशस्त्र प्रहरी बलको शीघ्र, संगठित र प्रभावकारी परिचालनले जनधनको क्षति न्यूनिकरण गर्न महत्वपूर्ण योगदान पुगेको छ । विपद् जोखिम न्यूनीकरणका लागि नागरिकसँग गरिएको प्रत्यक्ष संवाद र जनचेतनामूलक गतिविधि स्मरणीय रहेको स्थानीयवासी बताउँछन् ।
स्थानीय तह तथा सरोकारवाला निकायहरूसँगको समन्वयमा कृत्रिम विपद् अभ्यास, राहत, उद्धार तथा पुनर्स्थापनाका कार्यहरू प्रभावकारी रूपमा सञ्चालन भएका छन् । समुदायसँगको सम्बन्ध मजबुत बनाउन विभिन्न जनचेतनामूलक कार्यक्रमहरू सञ्चालन गरिएको छ । सीमावर्ती क्षेत्रका स्थानीय बासिन्दाहरूले एसपी के.सी.को व्यवहारिकता र कार्यशैलीप्रति सन्तुष्टि व्यक्त गरेका छन् ।
‘सीमावासीसँग सशस्त्र प्रहरी’ कार्यक्रमअन्तर्गत गरीब तथा पिछडिएका समुदाय लक्षित विभिन्न सामाजिक कार्यक्रम सञ्चालन गरिएको छ । ब्याड्पअन्तर्गत ‘क्विप’ अवधारणाअनुसार सीमा क्षेत्रमा सार्वजनिक प्रतीक्षालय तथा शौचालय निर्माण गरिएको छ । खानेपानी, सरसफाइ, विद्यालय तथा सार्वजनिक स्थल सुधार, सामुदायिक संरचना मर्मतजस्ता साना तर प्रभावकारी विकासात्मक कार्यहरू सम्पन्न गरिएको जनाइएको छ ।
क्विप कार्यक्रमले सीमावासीमा सुरक्षा निकायप्रति विश्वास बढाउँदै सहकार्यको वातावरण सिर्जना गरेको छ । एसपी के.सी.ले कमाण्ड सम्हालेपछि कार्यालयको भौतिक पूर्वाधार सुदृढीकरणमा समेत विशेष ध्यान दिनुभएको छ । व्यारेक, मेश, आवासीय संरचना तथा कार्यालय भवनहरूको सुधार र सौन्दर्यकरण गरिएको छ, जसले कार्य वातावरण थप व्यवस्थित र आकर्षक बनेको छ ।
सीमा क्षेत्रमा परिमाणमुखी तथा प्रभावकारी ड्युटी परिचालन र विशेष अपरेसन सञ्चालन गर्दै करिब पाँच करोड रुपैयाँ बराबरका अवैध सामान बरामद गरी भन्सार दाखिला गरिएको छ । साथै, विभिन्न स्थानबाट तयारी गाँजा, अफिम तथा लागुऔषधजन्य ट्याबलेटहरू बरामद गरी सम्बन्धित निकायमा बुझाइएको छ ।
आर्थिक अनुशासनमा शून्य सहनशीलता, व्यवसायिकता र पारदर्शिता कायम गर्न एसपी के.सी.को नेतृत्व निर्णायक बनेको बताइन्छ । अन्य सुरक्षा निकाय तथा भारतीय समकक्षी सुरक्षा निकायसँग निरन्तर समन्वय, सूचना संकलन र विश्लेषणमार्फत रणनीतिक रूपमा परिचालन गरी राजस्व चुहावट तथा अन्तर–सीमा अपराध न्यूनीकरणमा उहाँको भूमिका उल्लेखनीय रहेको छ ।
सीमित स्रोतसाधनका बाबजुद उपलब्ध स्रोतको अधिकतम उपयोग गर्दै कार्यालय व्यवस्थापन सुधार गरिएकाले कर्मचारीहरूको मनोबल र कार्यक्षमता वृद्धि भएको जनाइएको छ । कठिन र चुनौतीपूर्ण परिस्थितिमा समेत जिम्मेवारीपूर्वक कार्य सम्पादन गर्दै संगठनको छवि उकास्न उहाँले पुर्याउनुभएको योगदान सराहनीय र स्मरणीय रहेको जिल्लाका नागरिक तथा समाजसेवीहरू बताउँछन् ।
