नेपालको उड्डयन क्षेत्रमा नयाँ इतिहास रच्दै वीरगंजकी आयुषा कापरी पर्सा जिल्लाकी सबैभन्दा कान्छी पाइलट बन्न सफल भएकी छन् । परम्परागत रूपमा पुरुषप्रधान मानिने उड्डयन क्षेत्रमा उनको यो सफलता नेपाली महिलाको क्षमता, आत्मबल र सम्भावनाको सशक्त प्रमाण बनेको छ ।
पर्साको वीरगन्जमा वि.सं. २०६१ साल असार १५ गते जन्मिएकी आयुषाले बाल्यकालदेखि नै पाइलट बन्ने सपना देखेकी थिइन् । त्यही सपना साकार पार्ने लक्ष्यसहित उनले संयुक्त राज्य अमेरिका (अमेरिका) बाट पाइलट अध्ययन पूरा गरेकी छन् । आधुनिक प्रविधि, कडा अनुशासन र उच्च सुरक्षा मापदण्डका लागि परिचित अमेरिकामा अध्ययन गर्दै उनले कठिन र प्रतिस्पर्धात्मक प्रशिक्षण सफलतापूर्वक सम्पन्न गरेकी छन् ।
उड्डयन पेशा अत्यन्त जिम्मेवार, प्राविधिक तथा मानसिक रूपमा चुनौतीपूर्ण मानिन्छ । अन्तर्राष्ट्रिय स्तरको प्रशिक्षण वातावरणमा आफूलाई सक्षम सावित गर्दै आयुषाले कम उमेरमै पाइलट कोर्स पूरा गर्नु उनको निरन्तर मेहनत, अनुशासन र दृढ इच्छाशक्तिको परिणाम हो ।
सामान्य पारिवारिक पृष्ठभूमिबाट आएकी आयुषाका पिता वीरेन्द्र कापरी नेपाल आयल निगममा बाउजर अपरेटरका रूपमा कार्यरत छन् । सीमित स्रोतसाधनका बाबजुद परिवारको निरन्तर साथ, भरोसा र उत्साहले आयुषालाई आफ्नो लक्ष्यतर्फ अघि बढ्न महत्वपूर्ण भूमिका खेलेको देखिन्छ ।
त्यसैगरी, आयुषाको सफल यात्रामा मामा उमेश धिमालको सहयोग, मार्गदर्शन र प्रेरणा निर्णायक रहेको स्वंय आयुषाले बताएकी छन् । नेपाल आयल निगमअन्तर्गत एभिएसन फ्युल डिपो सिनामंगलमा कार्यरत धिमालबाट पाएको उड्डयन क्षेत्रसम्बन्धी अनुभव र व्यावहारिक सुझावले पाइलट बन्ने यात्रामा थप बल पुगेको उनले बताइन् ।
भौगोलिक रूपमा चुनौतीपूर्ण नेपालमा हवाई सेवा अत्यन्त महत्वपूर्ण मानिन्छ । यस्तो अवस्थामा दक्ष, अनुशासित र जिम्मेवार पाइलटहरूको आवश्यकता बढ्दो छ । पर्सा जिल्लाकी सबैभन्दा कान्छी पाइलटका रूपमा आयुषा कापरीको उदयले उड्डयन क्षेत्रमा महिलाको सहभागिता विस्तार गर्न र नयाँ पुस्तालाई प्रेरित गर्न महत्वपूर्ण योगदान पु¥याउने अपेक्षा गरिएको छ ।
आयुषा कापरीले केवल विमान उडाएकी मात्र होइनन्, उनले पर्सा जिल्लासहित देशभरका हजारौँ युवतीहरूको सपना र आत्मविश्वासलाई पनि उडान भर्न प्रेरित गरेकी छन् । उनको जीवनयात्रा संघर्ष, परिवारको साथ र आफन्तको सहयोगले असम्भवजस्तो देखिने सपना पनि सम्भव बनाउन सकिन्छ भन्ने सशक्त उदाहरण बनेको छ ।
