पर्सा जिल्लाको परवानीपुर गाउँपालिका–१ रहरीयाडिह गाउँमा बुधबार मध्यराति श्रीमतीकै योजनामा श्रीमान् र सासुको धारिलो हतियार प्रहार गरी हत्या गरिएको खुलेको छ ।
प्रहरीका अनुसार मनिता मण्डलको योजनामा उनका २७ वर्षीय श्रीमान् रामेश्वर महतो मण्डल र ४८ वर्षीया सासु सुमित्रा देवीको हत्या भएको हो । मनिता घरबाटै पक्राउ परेपछि प्रारम्भिक अनुसन्धानमा उनकै योजनामा हत्या भएको खुल्न आएको हो। दुवै जनाको घटनास्थलमै मृत्यु भएको प्रहरीले जनाएको छ ।
घटनामा मनिताकी २० वर्षीया अविवाहित नन्द रीना कुमारी मण्डल र ५४ वर्षीय ससुरा जगरुप महतो प्रतिकार गर्ने क्रममा गम्भीर घाइते भएका छन् । उनीहरू परवानीपुरस्थित एलएस न्युरो अस्पतालमा उपचाररत छन् ।
यसै घटनामा संलग्न रहेको आरोपमा प्रहरीले प्रसौनी गाउँपालिका–७ बन्जरिया गाउँका २७ वर्षीय धर्मेन्द्र महतोलाई वीरगन्जबाट पक्राउ गरी अनुसन्धान अघि बढाएको छ । धर्मेन्द्र केही महिनाअघि वैदेशिक रोजगारीबाट फर्किएका थिए ।
प्रहरी उपरीक्षक नरेन्द्र कुँवरका अनुसार प्रारम्भिक अनुसन्धानले मनिताको योजनामा प्रेमी धर्मेन्द्रसहित अन्य व्यक्तिहरू मिलेर हत्या गराएको देखाएको छ । उनले घटनाबारे थप सूक्ष्म अनुसन्धान भइरहेको बताए। मनिता र धर्मेन्द्रबीचको सम्बन्धबारे पनि गहिरो रूपमा अध्ययन भइरहेको प्रहरीको भनाइ छ । धर्मेन्द्र मनिताको माइती गाउँ बन्जरियाका बासिन्दा हुन्, जुन रहरीयाडिहसँग छिमेकी गाउँ हो ।
मृतक सुमित्रा र जगरुपका तीन छोरी र एक छोरा थिए। दुई छोरीको विवाह भइसकेको र एक छोरी रीना अविवाहित रहेर घरमै बस्दै आएकी थिइन् । एउटै छोरा रामेश्वर र उनकी आमाको हत्या भएको हो । मनिता घरकी एकलौती बुहारी थिइन् ।
स्थानीयवासीका अनुसार मनिता गत साउनदेखि घर र माइती दुवैतर्फ नबस्दै काठमाडौंमा बस्दै आएकी थिइन् । पछि खोजतलास गरी मंसिरमा घर ल्याइएको थियो । उनका श्रीमान् रामेश्वर दुई वर्ष मलेसियामा काम गरी डेढ वर्षअघि फर्किएका थिए र पुनः विदेश जाने तयारीमा थिए ।
छिमेकी बचियाका अनुसार घरको पछाडि रहेको बारी र बाँसघारी हुँदै पछाडिको ढोकाबाट घरभित्र प्रवेश गरी हत्या गरिएको हो। धारिलो हतियार प्रहार हुन थालेपछि रामेश्वरका ५ वर्षीय भान्जाले चिच्याउँदै पछाडिको ढोकाबाट भागेर सडकतर्फ पुगेका थिए ।
घटनास्थल वरिपरि बारी, शौचालय र चापाकल क्षेत्रमा रगत लागेको, लछारपछार भएको र मदिराको बोतल भेटिएको बताइएको छ। पछाडिको ढोकातर्फ महिलाको कपाल पनि भेटिएको छ ।
बचियाका अनुसार मनिताले सुतिरहेकी सासुलाई शौचालय जान भन्दै उठाएर पछाडिको ढोका खोलेकी थिइन्। सोही बेला आक्रमण भएको बताइएको छ ।
प्रहरीका अनुसार सासुको हत्या घर पछाडिको बारीतिर र श्रीमान् रामेश्वरको हत्या घरभित्रै भएको हो । रामेश्वर बोरा उद्योगमा कार्यरत थिए भने उनका ससुरा जगरुप तरकारी बिक्री गर्दै आएका थिए ।
हाल प्रहरीले घटनाको पृष्ठभूमि, संलग्न व्यक्ति र उद्देश्यबारे थप अनुसन्धान गरिरहेको जनाएको छ ।
