बारा जिल्लामा एकै रातमा पाँच वटा मोटरसाइकल चोरी भएपछि जिल्लाको सुरक्षा व्यवस्थामाथि गम्भीर प्रश्न उठेको छ । विभिन्न स्थानबाट एकै समयमा चोरी हुनु चोर समूह सक्रिय रहेको आशंकाका रूपमा हेरिएको छ ।
सिम्रौनगढ नगरपालिका–१०, देवापुर टेटामा नेपाल प्रहरीमा कार्यरत सहायक हवलदार जयकिशोर प्रसाद यादवको १५० सिसी पल्सर मोटरसाइकल चोरी भएको छ । उनी छुट्टीमा घर आएको बेला प्रदेश २–०३–०२१ प ६११५ नम्बरको मोटरसाइकल राति करिब १ बजे घरको ब्रान्डाबाट चोरी भएको हो । सोही क्रममा घरमा राखिएको केही नगद रकम समेत चोरी भएको पीडितले बताएका छन् ।
त्यस्तै, आदर्श कोतवाल गाउँपालिका–१, बोहामा पनि सोही रात चार वटा मोटरसाइकल चोरी भएका छन् । चोरी भएका मोटरसाइकलमध्ये दुई वटा यामाहा एफजेड र दुई वटा पल्सर रहेको जनाइएको छ । स्थानीय बलिराम बैठाको घरमा जग पूजा गर्न आएका पुरोहितको मोटरसाइकल समेत चोरी भएको छ ।
एकै रातमा प्रहरीको मोटरसाइकलसहित पाँच वटा मोटरसाइकल चोरी हुनु सामान्य घटना नभएको भन्दै स्थानीयवासीले चिन्ता व्यक्त गरेका छन् । “प्रहरीकै मोटरसाइकल सुरक्षित छैन भने सर्वसाधारणको अवस्था के होला ?” भन्दै स्थानीयले प्रश्न उठाएका छन् ।
पीडित नन्दु यादवका अनुसार चोरी भएको थाहा पाउनासाथ राति नै प्रहरीलाई जानकारी गराइएको थियो । तर समयमै खोजतलास सुरु नभएको भन्दै उनले गुनासो गरेका छन् । उनका अनुसार चोरीपछिको प्रारम्भिक अनुसन्धान प्रभावकारी नदेखिएको स्थानीयको धारणा छ ।
पछिल्लो समय जिल्लामा मोटरसाइकल चोरीका घटना बढ्दै गएको भन्दै स्थानीयले नियमित गस्ती, सीसीटीभी जडान तथा तत्काल अनुसन्धानलाई प्रभावकारी बनाउन प्रहरी प्रशासनसँग माग गरेका छन् ।
यता प्रहरीले घटनाबारे जानकारी पाउनासाथ अनुसन्धान सुरु गरिएको र चोरीमा संलग्न समूहको खोजी भइरहेको जनाएको छ ।
