राष्ट्रिय आविष्कार केन्द्र ले वीरगंजस्थित कृषि औजार कारखानाबाट स्थापनाकालदेखि हालसम्म झण्डै १७ लाख रुपैयाँ बराबरका कृषि उपकरण बिक्री वितरण गरेको छ ।
केन्द्रका प्रमुख महावीर पुन नेतृत्वमा सञ्चालनमा रहेको उक्त परियोजनाअन्तर्गत विभिन्न प्रकारका आधुनिक कृषि औजार उत्पादन तथा बिक्री हुँदै आएको छ ।
केन्द्रका वीरगंज प्रमुख इन्जिनियर रितेश देवका अनुसार हालसम्म मकै गोड्ने मेसिन ‘रिजर’ ३ सयभन्दा बढी थान बिक्री भइसकेको छ । यसको मूल्य १ हजार ५ सय रुपैयाँ तोकिएको छ ।
त्यसैगरी, झारपात सफा गर्ने उपकरण ‘रेक’ पनि ३ सयभन्दा बढी थान बिक्री भएको छ, जसको मूल्य ७ सय रुपैयाँ रहेको छ । मकै रोप्ने मेसिन ‘कर्न प्लान्टर’ २ वटा बिक्री भएको छ, जसको मूल्य १५ हजार रुपैयाँ छ ।
केन्द्रले धान रोप्ने ‘राइस प्लान्टर’ ७ वटा बिक्री गरेको छ, जसको मूल्य २६ हजार रुपैयाँ रहेको छ । साथै, विडर, खन्ने, जोत्ने लगायतका दुई दर्जनभन्दा बढी प्रकारका हाते उपकरणहरूबाट करिब ६० देखि ७० हजार रुपैयाँ बराबरको कारोबार भएको छ ।
अर्डरअनुसार केन्द्रले माछा उत्पादनका लागि ‘फिस इन्क्युवेटर मेसिन’ तथा ‘अक्सिजन एरिएसन मिक्सिङ टावर’ समेत उत्पादन गरी बिक्री गरिसकेको छ ।
यसैबीच, केन्द्रले हालै ब्याट्रीबाट चल्ने ‘कृषि इ–ट्रिलर’ समेत आविष्कार गरेको जनाएको छ ।
-1772177803.jpg)
