सिरहाको लहान नगरपालिका मा कार्यरत कर्मचारी तथा शिक्षकहरूको विगत चार महिनादेखि तलब रोकिएको छ ।
तलब नपाउँदा उनीहरूको दैनिकी चलाउन समस्या भएको भन्दै गुनासो बढ्दै गएको छ । सङ्घीय मामिला तथा सामान्य प्रशासन मन्त्रालय ले नगरपालिकाका सम्पूर्ण बैंक खाता रोक्का गरेपछि उक्त समस्या उत्पन्न भएको हो ।
एक विद्यालयका प्रधानाध्यापक नारायणप्रसाद साह ले मङ्सिरदेखि तलब–भत्ता मात्र नभई पाठ्यपुस्तक, छात्रवृत्ति, दिवा खाजा तथा विद्यालय व्यवस्थापन अनुदानसमेत रोकिएको बताए । “तलब नपाउँदा जीविका धान्न र बैंकको ऋणको ब्याज तिर्न समस्या भइरहेको छ,” उनले भने ।
नगरप्रमुख महेशप्रसाद चौधरी का अनुसार खाता रोक्का हुनुको मुख्य कारण प्रमुख प्रशासकीय अधिकृतको सरुवा विवाद र राजनीतिक पूर्वाग्रह हो । “यहाँका खाता रोक्का राख्नुपर्ने कुनै कारण छैन । राजनीतिक दबाबका कारण विवाद सिर्जना गरिएको हो,” उनले बताए । मन्त्रालयले निर्वाचनपछि खाता खोलिदिने आश्वासन दिए पनि हालसम्म कार्यान्वयन नभएको उनले गुनासो गरे ।
मन्त्रालयले साविकका प्रमुख प्रशासकीय अधिकृत जयकान्त झालाई सरुवा गरी शिक्षातर्फका उपसचिव खिम भुजेललाई पठाउन खोजेको थियो । तर नगरपालिकाले प्रशासनतर्फ अनुभवी उपसचिव माग गरेको थियो। सरुवा रोक्न माग गर्दै झाले प्रशासकीय अदालतमा मुद्दा दर्ता गरेका थिए । अदालतले गत फागुन ११ गते सरुवालाई यथास्थितिमा राख्न आदेश दिए पनि मन्त्रालयले अझै खाता फुकुवा गरेको छैन ।
यसैबीच, कर्मचारीहरूले इलाका प्रशासन कार्यालयमार्फत प्रधानमन्त्री कार्यालय र मन्त्रालयमा ज्ञापनपत्र बुझाउँदै नयाँ वर्ष २०८३ तथा सिरुवा पर्वअघि नै तलब भुक्तानी नभए सशक्त आन्दोलन गर्ने चेतावनी दिएका छन् ।
