राष्ट्रिय गौरवको आयोजना काठमाडौं–तराई मधेस द्रुतमार्गको निर्माण कार्य ५१ प्रतिशत सम्पन्न भएको छ ।
मकवानपुरको भीमफेदी र बकैया गाउँपालिकामा निर्माण भइरहेको द्रुतमार्गअन्तर्गत ३ हजार ४५४ मिटर लामो महादेवटार सुरुङको दुवैतर्फबाट भइरहेको खन्ने काम पूरा भई सुरुङ जोडिएको छ । सुरुङ छिचोलिएको अवसरमा आयोजित कार्यक्रममा आयोजना प्रमुख सहायक रथी भरतलाल श्रेष्ठले आयोजनाको समग्र भौतिक प्रगति ५१ प्रतिशत पुगेको जानकारी दिनुभयो ।
नेपाली सेनाका अनुसार द्रुतमार्गअन्तर्गत सात स्थानमा निर्माण भइरहेका १४ वटा सुरुङमध्ये धेद्रे, लेनडाँडा र महादेवटारका गरी ६ वटा सुरुङ खन्ने काम सम्पन्न भएको छ । अन्य चार स्थानमा रहेका आठ वटा सुरुङ निर्माणाधीन अवस्थामा छन् ।
यसैबीच, पूर्वाधार विकासमन्त्री सुनिल लम्सालले द्रुतमार्गको निर्माण निर्धारित समयभित्रै सम्पन्न गर्न निर्देशन दिनुभएको छ । कार्यक्रममा सम्बोधन गर्दै उहाँले सरकारले आयोजनाको काम निर्धारित समयभन्दा तीन वर्षभन्दा बढी ढिलो भएको स्वीकार गर्न नसक्ने बताउनुभयो ।
निर्माणमा ढिलाइ गर्ने ठेकेदार कम्पनीसँगको ठेक्का तत्काल रद्द गरिने चेतावनी दिँदै उहाँले पटक–पटक अवसर र सुविधा दिँदा पनि अपेक्षाअनुसार प्रगति नभए ठेक्का अन्त्य गर्न निर्देशन दिनुभयो । आउँदो जेठसम्म निर्धारित कार्यतालिकाअनुसार ठोस प्रगति देखिनुपर्ने उहाँको भनाइ थियो ।
आयोजनाअन्तर्गत ललितपुरको खोकना–डुकुछाप खण्डमा भने जग्गा अधिग्रहणसम्बन्धी समस्या अझै समाधान हुन सकेको छैन । उक्त ६ दशमलव ५ किलोमिटर खण्डको समस्या समाधानका लागि पहल भइरहेको र त्यसपछि ठेक्का व्यवस्थापन प्रक्रिया अघि बढाइने आयोजना प्रमुख श्रेष्ठले जानकारी दिनुभयो ।
राष्ट्रिय गौरवको आयोजनाका रूपमा रहेको काठमाडौं–तराई मधेस द्रुतमार्गले राजधानी काठमाडौंलाई तराई–मधेससँग छोटो दूरीमा जोड्ने लक्ष्य राखेको छ ।