नेपाल राष्ट्र बैंकले अनलाइन ठगी, फिसिङ, नक्कली लिंक, अनधिकृत कारोबार तथा डिजिटल भुक्तानीसम्बन्धी ठगीमा परे तत्काल १२४७ नम्बरमा सम्पर्क गर्न सर्वसाधारणलाई आग्रह गरेको छ ।
पछिल्लो समय मोबाइल बैंकिङ, डिजिटल वालेट तथा क्यूआर भुक्तानीको माध्यमबाट साइबर ठगीका घटना बढ्दै गएकाले राष्ट्र बैंकले यस्तो आग्रह गरेको हो । बैंकले शुक्रबार सूचना जारी गर्दै साइबर ठगीसम्बन्धी उजुरी तथा शंकास्पद कारोबारको जानकारी दिन चौबीसै घण्टा सञ्चालन हुने १२४७ नम्बर सार्वजनिक गरेको जनाएको छ ।
राष्ट्र बैंकका अनुसार उक्त नम्बर विभिन्न सरोकारवाला निकाय सम्मिलित एकीकृत साइबर स्क्याम प्रतिकार्य केन्द्रको सम्पर्क नम्बर हो ।
यस केन्द्रमा नेपाल प्रहरीको साइबर ब्युरो, बैंक तथा वित्तीय संस्था, भुक्तानी सेवा प्रदायक, दूरसञ्चार कम्पनी र इन्टरनेट सेवा प्रदायकका प्रतिनिधि एउटै स्थानमा रहेर साइबर ठगीविरुद्ध समन्वयात्मक रूपमा काम गर्ने व्यवस्था गरिएको छ ।
राष्ट्र बैंकले ठगीमा परेको अवस्थामा सम्बन्धित बैंक तथा वित्तीय संस्था वा भुक्तानी सेवा प्रदायकलाई तत्काल जानकारी गराई आफ्नो बैंक खाता तथा डिजिटल वालेट सुरक्षित गर्न आवश्यक पहल गर्न पनि आग्रह गरेको छ ।
केन्द्रमा उजुरी दर्ता भएपछि ठगीबाट प्राप्त रकम एउटा संस्थाबाट अर्को संस्थामा स्थानान्तरण भइसकेको अवस्थामा समेत थप कारोबार हुनुअघि रकम रोक्ने प्रयास गरिने राष्ट्र बैंकले जनाएको छ ।
डिजिटल कारोबारमा हुने ठगीबाट बच्न सतर्क रहन र कुनै शंकास्पद कारोबार वा अनलाइन ठगीको घटना भए ढिलाइ नगरी १२४७ मा सम्पर्क गर्न राष्ट्र बैंकले सर्वसाधारणलाई अनुरोध गरेको छ ।