गत बैशाख १ गतेदेखि चैत २४ गतेसम्म देशभर विभिन्न किसिमका विपद्का घटनामा परी ४ सय ९० जनाको मृत्यु भएको छ। यस अवधिमा १ हजार ९ सय ६५ जना घाइते भएका छन् भने ३८ जना बेपत्ता भएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरण ले सार्वजनिक गरेको तथ्यांकअनुसार करिब एक वर्षको अवधिमा देशभर ७ हजार ५ सय ४७ विपद्का घटना भएका छन् । ती घटनाबाट १३ हजार ५ सय ४ परिवार प्रत्यक्ष रूपमा प्रभावित भएका छन् ।
प्राधिकरणका अनुसार सामान्य सावधानी अपनाउँदा समेत रोक्न सकिने आगलागीका घटना सबैभन्दा धेरै ३ हजार ६ सय ५२ रहेका छन् । आगलागीमा परी मात्रै १ सय ४ जनाको मृत्यु भएको छ भने ५ सय ६३ जना घाइते भएका छन् । साथै ४ हजार १ सय ८२ परिवार प्रत्यक्ष रूपमा प्रभावित भएका छन् ।
त्यस्तै बाढीका ३ सय २८ घटनामा ३९ जनाको ज्यान गएको छ भने २७ जना बेपत्ता भएका छन् । बाढीका कारण १४ जना घाइते भएका छन् ।
६ सय २१ पहिरोका घटनामा ७६ जनाको मृत्यु भएको छ । भारी वर्षाका कारण ७ जनाको ज्यान गएको छ भने २० जना घाइते भएका छन् ।
यसैगरी ४ सय १९ चट्याङका घटनामा ४८ जनाको मृत्यु भएको छ । हावाहुरीका ४ सय ७७ तथा वन डढेलोका ३ सय २४ घटना भएका छन्, जसमा २ जनाको मृत्यु भएको छ ।
यस्तै जनावर आक्रमणका ५ सय ९ तथा लेक लाग्ने ( उच्च भूभागमा अक्सिजन कमी हुने ) १ सय ३१ घटना समेत भएका छन् ।
प्राधिकरणले विपद् जोखिम न्यूनीकरणका लागि आवश्यक सावधानी अपनाउन तथा सचेत रहन सबैलाई आग्रह गरेको छ ।
