हरिद्वारबाट नेपालतर्फ आउँदै गरेको ‘नेपाल–भारत मैत्री सेवा’ को बस आज बिहान करिब २ बजे भारतको उत्तराखण्डस्थित गदरपुर नजिकै दुर्घटनामा परेको छ ।
गोपाल नगर टी–जंक्सन नजिकै अनियन्त्रित भई सडकबाट तल खेतमा खसेर बस पल्टिएको हो । यूके १००५३ नम्बरको उक्त बसमा चालक दलका सदस्यसहित ६५ जना यात्रु सवार थिए । तीमध्ये अधिकांश यात्रु नेपाल दाङ जिल्लाका रहेको खुलेको छ ।
प्रारम्भिक जानकारीअनुसार दुर्घटनाको समयमा पानी परिरहेको र चालकलाई निद्रा लागेको कारण बस अनियन्त्रित भएको हुनसक्ने अनुमान गरिएको छ । बस पल्टिएपछि यात्रुहरूबीच भागाभाग र कोलाहल मच्चिएको थियो भने धेरै यात्रुहरू बसभित्रै फसिरहेका थिए ।
गदरपुर कोतवालीका प्रहरी प्रमुख सञ्जय पाठकका अनुसार दुर्घटनाको सूचना प्राप्त हुनासाथ प्रहरी टोली र आपतकालीन सेवा (११२ र १०८ एम्बुलेन्स) घटनास्थलमा पुगेका थिए । स्थानीय बासिन्दाको सहयोगमा बसका झ्यालका सिसा फुटाएर भित्र फसेका यात्रुहरूको उद्धार गरिएको थियो ।
दुर्घटनामा परी ९ जना यात्रु घाइते भएका छन्, जसमध्ये ६ जनाको अवस्था गम्भीर रहेको छ । घाइतेहरूमा एक महिनाकी बालिका नव्या पनि रहेकी छन्। गम्भीर घाइतेमध्ये दुई जनालाई थप उपचारका लागि रुद्रपुरस्थित ठूलो अस्पतालमा रिफर गरिएको छ। उनीहरू दुवै नेपाली नागरिक हुन् । अन्य घाइतेहरूको स्थानीय अस्पतालमा उपचार भइरहेको छ ।
दुर्घटनापछि बाँकी यात्रुहरूलाई सुरक्षित स्थानमा सारिएको छ। बस सञ्चालकलाई घटनाबारे जानकारी गराइसकिएको छ र यात्रुहरूलाई गन्तव्यसम्म पुर्याउन अर्को बसको व्यवस्था मिलाइँदैछ ।
राजमार्ग अधिकारीहरूले क्रेनको सहयोगमा दुर्घटनाग्रस्त बस सडकबाट हटाएका छन् र अहिले यातायात पुनः सुचारु भएको छ । प्रहरीले घटनाबारे थप अनुसन्धान भइरहेको जनाएको छ ।
