आजदेखि देशभर दोस्रो आर्थिक गणना सुरु भएको छ । राष्ट्रिय तथ्याङ्क कार्यालयका अनुसार गणनाका लागि गणक तथा सुपरीवेक्षकहरू सम्बन्धित क्षेत्रमा पुगिसकेका छन् ।
निर्धारित कार्यतालिकाअनुसार स्थलगत तथ्याङ्क सङ्कलनको काम आगामी असारको पहिलो साताभित्र सम्पन्न गरिने लक्ष्य राखिएको छ । यसका लागि करिब पाँच हजार जनशक्ति परिचालन गरिएको छ ।
अर्थ मन्त्रालयले मुलुकको समग्र औद्योगिक तथा आर्थिक अवस्थासँग सम्बन्धित महत्वपूर्ण तथ्याङ्क सङ्कलन गरिने भएकाले सबैलाई सहयोग गर्न आग्रह गरेको छ ।
यस गणनामा उद्योग, व्यापार, सेवा क्षेत्र, सहकारी, निजी तथा सार्वजनिक संस्थाको सङ्ख्या, प्रकृति, लगानी, रोजगारी, उत्पादन तथा सेवा प्रवाहलगायत १८ वटा आर्थिक क्षेत्रका आधारभूत विवरण सङ्कलन गरिनेछ ।
त्यसैगरी दर्ता भएका वा नभएका साना–ठूला व्यापार प्रतिष्ठान, रोजगारी दिने तथा स्वरोजगारमा आधारित व्यवसाय, उद्योग–कलकारखाना, गैरसरकारी सङ्घसंस्था, सरकारी संस्थान, विद्यालय, अस्पताललगायत विभिन्न क्षेत्रको विवरण पनि संकलन गरिनेछ ।
आर्थिक गणनाको पूर्वतयारीका काम गत फागुन मसान्तमै सम्पन्न भइसकेका छन् । चैतको सुरुआतमा ७७ जिल्ला र थप सात गरी कुल ८४ वटा कार्यालय स्थापना गरिएका छन्, जुन आगामी असार मसान्तसम्म सञ्चालनमा रहनेछन् ।
यसअघि विसं २०७५ मा गरिएको राष्ट्रिय आर्थिक गणनामा देशभर ९ लाख २३ हजार ३५६ प्रतिष्ठान तथा व्यवसाय सञ्चालनमा रहेको तथ्य सार्वजनिक भएको थियो ।
