एसिड आक्रमणबाट बाँचेकाहरूको जीवनकथा समेटिएको चलचित्र ‘नमेटिने घाउ’ भदौ ७ गते अर्थात भोलि शुक्रबारदेखि प्रदर्शनमा आउन लागेको छ ।
यो चलचित्र अभिनेता रमित ढुङ्गानाको निर्माण तथा निर्देशनमा बनेको हो, जसमा वीरगंजकी मुस्कान खातुनसहित ३३ जना एसिड पीडितहरूको कथालाई समेटिएको छ । चलचित्र ‘नमेटिने घाउ’ सामाजिक विषयवस्तुमा आधारित छ। निर्देशक रमित ढुङ्गानाले विभिन्न समय र स्थानमा भएका एसिड आक्रमणका सत्य घटनाहरूलाई चलचित्रमार्फत प्रस्तुत गरिएको र समाजमा सकारात्मक सन्देश दिने उद्देश्य रहेको बताए ।
मुस्कान खातुनले एसिड आक्रमणपछि आफूले भोगेको पीडाको विषयवस्तु चलचित्रमा समेटिएको बताएकी छन् । उनले आक्रमणपछि देश तथा विदेशका विभिन्न चर्चित व्यक्तिहरूले दिएको हौसलाको विषय पनि चलचित्रमा समावेश गरिएको छ । चलचित्रमा एसिड आक्रमणका दोषीहरूलाई दिइने दण्ड सजायका विषयलाई पनि उजागर गरिएको छ, जसले यस्ता घटनामा कमी ल्याउन मद्दत गर्ने आशा गरिएको छ ।
चलचित्रमा शिवम् अधिकारीद्वारा लिखित कथा समावेश गरिएको छ, जसलाई ढुङ्गानाले निर्देशन र निर्माण गरेका छन् । मुस्कानले कानुनका कमजोरीहरू र त्यसबाट भोगेको पीडालाई चलचित्रमा देखाइएको बताएकी छन् । चलचित्रमा तत्कालीन प्रधानमन्त्री केपी शर्मा ओली र वरिष्ठ नेता माधवकुमार नेपाल, साथै सांसद ज्ञानेन्द्र शाही लगायतले कानुन परिवर्तनमा खेलेको भूमिकालाई वहाहरूकै अभिनयमा समेटिएको छ ।
चलचित्रमा मुस्कान खातुन, प्राप्ति पौडेल, इभा गिरी, कमल देवकोटा, सन्दीपबाबू लोहनी लगायतका कलाकारहरूको अभिनय रहेको छ । चलचित्रको ट्रेलर सार्वजनिक भइसकेको छ, जसले दर्शकहरूबाट सकारात्मक प्रतिक्रिया पाएको छ ।
३ करोड लगानीमा बनेको यस चलचित्रले न्यायका लागि वकालत गर्न सघाउने अपेक्षा निर्देशक रमित ढुङ्गानाले गरेका छन् ।
