पर्साको वीरगंजस्थित मधेस प्रदेश सरकारअन्तर्गतको पूर्वाधार विकास कार्यालय पर्सामा कमिशनकाे खेलमा कर्मचारीसँग विवाद भएपछि बोर्डमा मोबिल छर्केकाे आरोपमा दुई जनालाई प्रहरीले पक्राउ गरेको छ ।
वीरगंज महानगरपालिका–२३ स्थित कार्यालय परिसरमा पुगेका उनीहरूले कार्यालयका कर्मचारीसँग पूर्वाधार योजनासम्बन्धी विषयलाई लिएर विवाद गरेका थिए । विवाद चर्किँदै जाँदा याेजना पार्न कमिशन मागेकाे भन्दै उनीहरूले कार्यालयको सूचना बोर्डमा मोबिल छर्केर विराेध जनाएका थिए । कार्यालयका कर्मचारीले कमिशनकाे विषयलाई ढाकछाेप गर्दै कार्यालयको वातावरण अस्तव्यस्त बनाएको आरोपमा प्रहरी मार्फत पक्राउ गराएको छ ।
पक्राउ पर्नेहरूमा वीरगंज महानगरपालिका–११ का ३३ वर्षीय जयपुजन ठाकुर लोहार र वडा नं. १३ राधेमाईका ३० वर्षीय मनमोहन पाण्डे रहेका छन् । जिल्ला प्रहरी कार्यालय पर्साका अनुसार उनीहरू कार्यालयका कर्मचारी रामप्रवेश यादवसँग योजनाको विषयलाई लिएर बहसमा उत्रिएका थिए । प्रारम्भिक अनुसन्धान अनुसार योजना सम्बन्धी असन्तुष्टि भएर विवाद उत्पन्न भएको देखिएको छ । घटनापछि दुवै व्यक्ति कार्यालय परिसरबाट भागेका थिए ।
पूर्वाधार विकास कार्यालयका कार्यालय प्रमुखले तत्कालै वडा प्रहरी कार्यालय श्रीपुरमा जानकारी गराएपछि प्रहरीले दुवै जनालाई नियन्त्रणमा लिएको पर्सा प्रहरीले जनाएको छ । जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक राजु कार्कीका अनुसार पक्राउ परेका दुवै जनामाथि सार्वजनिक सम्पत्ति तोडफोड, सरकारी कर्मचारीमाथि अभद्र व्यवहार तथा कार्यालय सञ्चालनमा बाधा पुर्याएको आरोपमा थप अनुसन्धान भइरहेको जनाएकाे छ । प्रहरीले सरकारी कार्यालयजस्तो संवेदनशील स्थानमा गरिएको यस्तो गतिविधि गम्भीर प्रकृतिको हुने भन्दै आवश्यक कानुनी प्रक्रिया अघि बढाएको जनाएकाे छ ।
यता याेजना कमिशनकाे विषयमा भने कर्मचारी उपर कुनै किसिमकाे छानविन तथा साेधपुछ नभएकाे स्राेतले जनाएकाे छ ।
