विकास निर्माणका योजनामा लापरबाही गर्दै काम अलपत्र पार्ने निर्माण कम्पनीविरुद्ध जितपुरसिमरा उपमहानगरपालिका ले कडा कदम चाल्ने भएको छ ।
उपमहानगरपालिकाले २३ वटा निर्माण कम्पनीसँग गरिएको ठेक्का सम्झौता तोड्ने प्रक्रिया औपचारिक रूपमा अघि बढाएको जनाएको छ ।नगरपालिकाका अनुसार पटक–पटक निर्देशन दिँदा पनि बेवास्ता गर्दै तोकिएको समयसीमाभित्र काम सम्पन्न नगर्ने, गुणस्तरहीन निर्माण गर्ने तथा उल्लेख्य प्रगति नै नदेखाउने प्रवृत्ति बढेपछि यस्तो निर्णय लिनुपरेको हो ।
आर्थिक वर्ष २०७७/०७८ देखि २०८१/०८२ सम्मका विभिन्न योजनामा सम्झौता भए पनि धेरै काम अझै अधुरै अवस्थामा रहेका छन्।
केही कम्पनीले अग्रिम भुक्तानी लिएर काम नै सुरु नगरेको, कतिपयले आधामै काम छाडेको र धेरैले परियोजनाप्रति जिम्मेवारी नदेखाएको उपमहानगरपालिकाको निष्कर्ष छ ।
यसैबीच, सम्बन्धित कम्पनीलाई १५ दिनभित्र स्पष्ट कार्ययोजना सहित उपस्थित हुन निर्देशन दिइएको छ। संशोधित कार्यतालिका, स्रोत–साधन परिचालनको विवरण र काम सम्पन्न गर्ने प्रतिबद्धता पेश गर्न भनिएको छ । साथै, “ठेक्का किन नतोड्ने?” भन्ने आधारसहित स्पष्टीकरणसमेत माग गरिएको छ ।
निर्धारित समयभित्र सन्तोषजनक जवाफ नआएमा सार्वजनिक खरिद ऐन, २०६३ को दफा ५९ तथा सार्वजनिक खरिद नियमावली, २०६४ अनुसार ठेक्का रद्द गरिने, कालोसूचीमा राखिने, जमानत जफत गरिने र बाँकी कामको खर्च असुल गरिने चेतावनी दिइएको छ ।
कारबाहीको दायरामा सम्राट निर्माण सेवा, प्रतिक्षा निर्माण सेवा, बब्लु कन्स्ट्रक्सन, एच.पी. निर्माण सेवा, शिव निर्माण सेवा, ॐ बृहस्पति निर्माण सेवा, एस एण्ड बि कन्स्ट्रक्सन, श्री राम कन्स्ट्रक्सन, शिवा निर्माण सेवा, एन के कन्स्ट्रक्सन, धिरज निर्माण सेवा, संकट मोचन निर्माण सेवा, समिर कन्स्ट्रक्सन, एन.टि. बारा कन्स्ट्रक्सन, एन.एन. कन्स्ट्रक्सन, डि.एण्ड डि कन्स्ट्रक्सन, प्रतिभा निर्माण सेवा, झुन झुन कन्स्ट्रक्सन, रञ्जीत कन्स्ट्रक्सन एण्ड सप्लायर्सलगायत कम्पनीहरू रहेका छन् ।
उपमहानगरपालिकाले निर्माण कार्यमा उत्तरदायित्व र पारदर्शिता कायम गर्न यस्तो कदम चालिएको जनाएको छ । साथै, आगामी दिनमा विकास आयोजनाहरू समयमै र गुणस्तरीय रूपमा सम्पन्न गराउन कडाइका साथ अनुगमन गरिने समेत स्पष्ट पारिएको छ ।
