पर्साको जगरनाथपुर गाउँपालिका वडा नं. ६ सन्ठीमा बुधबार तीज पर्वको उल्लासमय वातावरणमा महिलाहरूबीच शुभकामना आदानप्रदान तथा दर खाने कार्यक्रम सम्पन्न भएको छ।
जगरनाथपुर गाउँपालिकाको आयोजनामा सम्पन्न कार्यक्रममा पर्सा क्षेत्र नं. ४ का प्रतिनिधि सभा सदस्य तथा पूर्वमन्त्री रमेश रिजालले उद्घाटन गरेका थिए । कार्यक्रमलाई सम्बोधन गर्दै पूर्वमन्त्री रिजालले तीज पर्वको दर खाने कार्यक्रमले महिलाहरूको स्वतन्त्रता र एकता झल्काएको बताएका थिए । उनले “अहिले तीज पर्वको दर खाने कार्यक्रमले महिलाहरूलाई स्वतन्त्रता र सामाजिक एकता प्रदान गरेकाे छ । यसले महिलाहरूबीचको आपसी सम्बन्धलाई थप मजबुत समेत बनाएको छ ।”
यसैगरी मधेश प्रदेशका भूमि व्यवस्था तथा कृषि सहकारी मन्त्री जनार्दन सिंह क्षेत्रीले तीज विशेष कार्यक्रमले पर्सा जिल्लामा सांस्कृतिक पहिचानको अद्वितीय मिसाल प्रस्तुत गरेको बताए । उनले “यस्ता कार्यक्रमले महिलाहरूबीचको सम्बन्धलाई थप प्रगाढ बनाउँछन् र समाजमा सकारात्मक प्रभाव पार्छन् ।”
श्री ने.रा.मा.वि. सन्ठीमा सम्पन्न कार्यक्रमको आकर्षण भोजपुरी गायक सुनील पण्डितको सांगीतिक प्रस्तुति रहेको थियो ।
गाउँपालिका अध्यक्ष श्रीकान्त प्रसाद यादवको अध्यक्षतामा सम्पन्न कार्यक्रममा प्रदेश सभा सदस्य शंकर चौधरी, नेपाली कांग्रेस मधेश प्रदेशका महामन्त्री बृहस्पती कृष्ण श्रेष्ठ, पर्साका उपसभापति रामनारायण कुर्मी, प्रवक्ता रमेश पाण्डे, सहसचिव नवीन सिंह, महाधिवेशन प्रतिनिधि वशिष्ठनारायण कुर्मी, सहरुम राउत गद्दी, क्षेत्रीय सचिव बलिष्टर अहमद, कोषाध्यक्ष विनय द्विवेदी, जिल्ला सदस्य अजय पटेल, जगरनाथपुर गाउँपालिकाकी उपप्रमुख बबिता सिंह, कालिकामाई गाउँपालिकाकी उपप्रमुख राजमती चौधरी, मन्जय गिरीलगायतका स्थानीय महिला, शिक्षक तथा कर्मचारीहरूको सहभागिता रहेको थियो ।
कार्यक्रमको सञ्चालन गाउँपालिकाका स्वास्थ्य शाखा प्रमुख प्रवेन्द्र साहले गरेका थिए ।
