वीरगंज महानगरपालिका–२८ बगहीस्थित मुख्य सडकको कटरा खोलामा रहेको पुल भाँसिएपछि ठूला सवारीको आवागमनमा समस्या उत्पन्न भएको छ ।
पुल भाँसिएपछि उत्तरदेखि दक्षिणतर्फ वीरगंज आउनेजाने स्थानीय र सवारी साधनलाई आवतजावतमा कठिनाइ भएको हो । करिब दुई महिना अघि भाँसिएको उक्त पुलको पुनर्निर्माणका लागि वीरगंज महानगरपालिकाका प्रमुख राजेशमान सिंहलाई लिखित रूपमा जानकारी गराए पनि नगरप्रमुख सिंहले नगरपालिकाबाट पुल निर्माण नहुने जवाफ फर्काएको वडाध्यक्ष सरजुग महतोले बताए ।
नगरप्रमुखले पुल निर्माणमा रुचि नदेखाएपछि वडाको बजेटबाट पाँच लाख खर्च गरेर तत्काल डाइभर्सन बनाइएको महतोले जानकारी दिए । पुल पुनर्निर्माणका लागि शहरी विकास मन्त्रालयमा एक करोड २० लाखको लागत प्रस्ताव गरिएको उनले बताए ।
सडकको यस खण्डमा पुल भाँसिँदा दैनिक आवतजावत गर्ने सर्वसाधारण र व्यवसायिक सवारी साधनहरूलाई समस्या भइरहेको स्थानीयहरु बताउँछन् ।
सम्बन्धित समाचार
