काठमाडौँ । नेपाली कांग्रेसले सरकारका कमीकमजोरीविरुद्ध सशक्त रूपमा खबरदारी गर्ने निर्णय गरेको छ ।
शनिबार सिंहदरबारस्थित संसदीय दलको कार्यालयमा बसेको नेपाली कांग्रेस संसदीय दल कार्यसमितिको बैठकले सरकारको कामकारबाहीको प्रारम्भिक समीक्षा गर्दै सदनमार्फत सरकारका कमजोरी र कमीकमजोरीहरूबारे प्रभावकारी रूपमा आवाज उठाउने निर्णय गरेको हो ।
बैठकपछि सञ्चारकर्मीसँग कुरा गर्दै कांग्रेस महामन्त्री प्रदीप पौडेलले संसद्मा जनताका सरोकारका विषयहरूलाई प्रभावकारी रूपमा उठाउने तथा राष्ट्रिय महत्वका मुद्दाहरूमा पार्टी र संसदीय दलबीच थप समन्वय गर्ने विषयमा छलफल भएको जानकारी दिए ।
उनले प्रमुख प्रतिपक्षी दलका रूपमा कांग्रेसले निरन्तर रूपमा आफ्ना विषयहरू सदनमा उठाउँदै आए पनि सरकारले त्यसलाई गम्भीरतापूर्वक नलिएको आरोप लगाए । सरकारले जनचाहनाअनुसार काम गर्न नसकेको भन्दै कांग्रेसले निरन्तर खबरदारी गरिरहने उनले बताए ।
महामन्त्री पौडेलले विषयगत मन्त्रालयहरूको कार्यसम्पादन अध्ययन गर्न पार्टीका नेताहरूलाई जिम्मेवारीसमेत तोकिएको जानकारी दिए। उनले सरकार गठन भएको सय दिन पुग्न लाग्दा पनि सरकारले उल्लेखनीय उपलब्धि हासिल गर्न नसकेको तथा घोषणा गरिएका प्राथमिकतामध्ये १० वटा कामसमेत पूरा गर्न नसकेको दाबी गरे ।
कांग्रेसले सरकारको कार्यशैलीप्रति निगरानी बढाउँदै जनजीविका, सुशासन र विकाससँग सम्बन्धित विषयहरूलाई संसद्मा सशक्त रूपमा उठाउने जनाएको छ ।
