बारा जिल्लाको जितपुरसिमरा उपमहानगरपालिकाले आगामी आर्थिक वर्ष २०८३/०८४ का लागि १ अर्ब ८७ करोड रुपैयाँको बजेट ल्याउने तयारी गरेको छ।
उपमहानगरले असार १० गते हुने नगरसभामार्फत बजेट सार्वजनिक गर्ने जनाएको छ । उपमहानगरका योजना शाखा प्रमुख सुधन चौधरीका अनुसार आगामी आर्थिक वर्षका लागि २४ वटै वडामा कुल २२ करोड १६ लाख रुपैयाँ बजेट विनियोजन गरिएको छ । विनियोजित रकममध्ये ५० प्रतिशत अर्थात् ११ करोड ८ लाख रुपैयाँ सबै वडामा समान रूपमा वितरण गरिएको छ भने बाँकी रकम जनसंख्या, भूगोल र राजस्व संकलनको आधारमा बाँडफाँट गरिएको छ । उनका अनुसार सबैभन्दा कम बजेट वडा नम्बर ९ लाई ६१ लाख रुपैयाँ र सबैभन्दा बढी बजेट वडा नम्बर २२ लाई १ करोड २३ लाख ७८ हजार रुपैयाँ विनियोजन गरिएको छ ।
उपमहानगरले प्रत्येक वडालाई २१ लाख रुपैयाँ बराबरका ससर्त कार्यक्रमसमेत उपलब्ध गराएको छ । घर नम्बरिङ, बालमैत्री, वातावरणमैत्री तथा महिलामैत्री वडा घोषणा, साथै भूमिहीन सुकुम्बासीको तथ्याङ्क संकलनका लागि उक्त कार्यक्रम सञ्चालन गरिने योजना शाखाले जनाएको छ । उपमहानगरलाई आगामी आर्थिक वर्षका लागि संघीय सरकारले ५१ करोड रुपैयाँ तथा मधेश प्रदेश सरकारले ५ करोड रुपैयाँ बराबरका ससर्त कार्यक्रम उपलब्ध गराएको छ।
कुल १ अर्ब ८७ करोड रुपैयाँ बजेटमध्ये करिब ८ देखि १० करोड रुपैयाँ जितपुरसिमरा नगर अस्पतालको सञ्चालन तथा व्यवस्थापनमा खर्च गरिनेछ । यस्तै, कर्मचारीको बढेको तलब तथा भत्तालगायत अनिवार्य दायित्वमा ४५ करोड रुपैयाँ र विगतका योजनाको भुक्तानी मिलानमा ४० देखि ५० करोड रुपैयाँ खर्च हुने अनुमान गरिएको छ । योजना शाखा प्रमुख चौधरीले दोस्रो स्थानीय तह निर्वाचनपछिको अन्तिम कार्यकाल भएकाले यस वर्षको नगरसभामा विगतमा जस्तो विवाद, हुलदङ्गा वा टेबल–कुर्सी तोडफोड नहुने दाबी गर्नुभयो । उहाँका अनुसार सबै वडाध्यक्षहरूको सहमतिमा नगरसभा शान्तिपूर्ण र व्यवस्थित रूपमा सञ्चालन गर्ने सहमति भएको छ ।
गत आर्थिक वर्ष २०८२/०८३ मा उपमहानगरले २ अर्ब १ लाख रुपैयाँको बजेट ल्याएको थियो । तर करिब ५० करोड रुपैयाँ घाटा बजेटका कारण पुराना योजनाहरूको भुक्तानीमा समस्या उत्पन्न भएको थियो ।
उपमहानगरले सम्पत्ति कर, बहाल कर, मालपोत, मनोरञ्जन कर, सवारी कर, कवाडी कर तथा ढुङ्गा, गिटी र बालुवालगायत ३६ वटा शीर्षकबाट राजस्व संकलन गर्दै आएको छ । ती शीर्षकबाट वार्षिक करिब २५ करोड रुपैयाँ राजस्व संकलन हुने गरेको उपमहानगरको तथ्याङ्क छ ।
