रौतहटको गरुडा नगरपालिका–४ बाट चोरी भएको मोटरसाइकलसहित प्रहरीले ३० मिनेटभित्रै दुई जनालाई पक्राउ गरेको छ ।
पक्राउ पर्नेमा गढीमाई नगरपालिका–६ निवासी २० वर्षीय अनिल कुमार साह र सोही स्थानका २० वर्षीय रामनारायण यादव रहेका छन् । उनीहरूलाई चोरी भएको मोटरसाइकलसहित नियन्त्रणमा लिइएको इलाका प्रहरी कार्यालय गरुडाका प्रमुख डीएसपी शंकरप्रसाद आचार्यले जानकारी दिए । मंगलबार साँझ करिब ६ः३० बजे गरुडा नगरपालिका–४ स्थित एक घरअगाडि पार्किङ गरी राखिएको बा.प्र.०२–०४१ प ३८४९ नम्बरको २२० सीसी पल्सर मोटरसाइकल चोरी भएको थियो ।
मोटरसाइकल चोरी भएको सूचना प्राप्त हुनासाथ प्रहरी चौकी धर्मपुरबाट प्रहरी टोली परिचालन गरिएको थियो । टोलीले गढीमाई नगरपालिका–६ स्थित धर्मपुर गाउँबाट बाहिरिने एकमात्र पुलमा निगरानी बढाउँदै सवारीसाधन चेकजाँच गरेको थियो । चेकजाँचका क्रममा साँझ ७ बजे चोरी भएको मोटरसाइकलसहित दुवै आरोपीलाई नियन्त्रणमा लिन सफल भएको डीएसपी आचार्यले बताए ।
पक्राउ परेका दुवै जनामाथि थप अनुसन्धान भइरहेको प्रहरीले जनाएको छ ।
