प्रत्येक वर्ष असार १५ गते मनाइने राष्ट्रिय धान दिवस आज देशभर धान रोपाइँ, दही–चिउरा खाने तथा कृषकको सम्मान गर्दै विविध कार्यक्रमका साथ मनाइएको छ ।
यसै अवसरमा मधेस प्रदेशका मुख्यमन्त्री कृष्ण यादव पनि खेतमै उत्रिएर कृषकसँगै धान रोपाइँमा सहभागी भएका छन् । रौतहटको कटहरिया नगरपालिका–६ मा राष्ट्रिय किसान महासंघको आयोजनामा सम्पन्न धान रोपाइँ कार्यक्रममा मुख्यमन्त्री यादवले हिलोमा उत्रिएर धान रोपेका छन् । कार्यक्रममा नेपाली कांग्रेसका नेताहरू, जनप्रतिनिधि, किसान तथा स्थानीयवासीको उल्लेखनीय सहभागिता रहेको थियो ।
कार्यक्रमलाई सम्बोधन गर्दै मुख्यमन्त्री यादवले कृषि नेपालको अर्थतन्त्रको प्रमुख आधार भएको उल्लेख गर्दै कृषकको जीवनस्तर उकास्न प्रदेश सरकारले कृषि क्षेत्रलाई उच्च प्राथमिकतामा राखेको बताए । उनले आधुनिक कृषि प्रविधिको प्रयोग, सिँचाइको विस्तार, उन्नत बीउ तथा मलको सहज उपलब्धतामार्फत कृषि उत्पादन र उत्पादकत्व वृद्धि गर्न प्रदेश सरकार प्रतिबद्ध रहेको बताए ।
मुख्यमन्त्री यादवले कृषकको मेहनत र योगदानको सम्मान गर्दै युवालाई कृषि पेशाप्रति आकर्षित गर्न आवश्यक रहेको उल्लेख गरे। उनले कृषिलाई व्यवसायिक, आधुनिक र प्रविधिमैत्री बनाउन प्रदेश सरकारले विभिन्न कार्यक्रम सञ्चालन गरिरहेको जानकारी दिए ।
असार १५ लाई नेपालमा राष्ट्रिय धान दिवसका रूपमा मनाउने परम्परा रहेको छ। यस दिन धान रोपाइँसँगै दही–चिउरा खाने सांस्कृतिक परम्पराले कृषिप्रति सम्मान र किसानको श्रमको कदर गर्ने सन्देश दिने विश्वास गरिन्छ ।
