जलवायुमैत्री कृषि प्रविधिको प्रयोगमार्फत धान उत्पादन वृद्धि गर्दै धानमा आत्मनिर्भर बनाउनुपर्नेमा जोड दिइएको छ ।
२३औँ राष्ट्रिय धान दिवस तथा रोपाइँ महोत्सवका अवसरमा धनुषामा आयोजित कार्यक्रममा वक्ताहरूले जलवायुमैत्री कृषि प्रविधिको प्रयोगमार्फत धान उत्पादन वृद्धि गर्दै देशलाई धानमा आत्मनिर्भर बनाउनुपर्नेमा जोड दिएका छन् । ‘जलवायुमैत्री प्रविधि, धानमा आत्मनिर्भरता र समृद्धि’ भन्ने मूल नारासहित सोमबार आयोजित कार्यक्रममा कृषि क्षेत्रमा समयानुकूल आधुनिक प्रविधिको प्रयोग अपरिहार्य रहेको धारणा व्यक्त गरिएको हो ।
राष्ट्रिय धानबाली अनुसन्धान कार्यक्रम हर्दिनाथका धान संयोजक डा. मथुरा यादवले जलवायु परिवर्तनका कारण धान खेतीमा नयाँ–नयाँ चुनौती थपिँदै गएको उल्लेख गर्दै उन्नत जात, गुणस्तरीय बीउ, प्रभावकारी सिँचाइ व्यवस्थापन तथा वैज्ञानिक खेती प्रणाली अपनाउन सके उत्पादन उल्लेखनीय रूपमा बढाउन सकिने बताए । उनले जलवायुमैत्री प्रविधिको प्रयोगलाई प्राथमिकतामा राख्नुपर्ने आवश्यकता औँल्याए ।
पूर्व धान संयोजक निरञ्जनप्रसाद अधिकारीले कृषि अनुसन्धानबाट विकसित प्रविधिलाई प्रभावकारी रूपमा किसानसम्म पुर्याउन सके धान उत्पादनमा उल्लेखनीय वृद्धि सम्भव हुने बताए । उनले अनुसन्धान संस्था र किसानबीचको समन्वयलाई अझ सुदृढ बनाउनुपर्नेमा जोड दिए ।
धनुषाका प्रमुख जिल्ला अधिकारी प्रेमप्रसाद लुइँटेलले कृषि नेपालको अर्थतन्त्रको प्रमुख आधार भएकाले धान उत्पादन वृद्धि गर्नु राष्ट्रिय आवश्यकता भएको बताए । सरकारी निकाय, अनुसन्धान संस्था र किसानबीचको सहकार्यबाट खाद्य सुरक्षालाई थप सुदृढ बनाउन सकिने उनको विश्वास थियो ।
जिल्ला प्रहरी कार्यालय धनुषाका प्रहरी उपरीक्षक रूपेश खड्काले कृषि उत्पादन वृद्धि र ग्रामीण समृद्धिका लागि सबै निकायको सहकार्य आवश्यक रहेको बताए । सशस्त्र प्रहरी बलका प्रहरी नायव उपरीक्षक दिनेश शर्माले कृषिको विकासले समग्र समाजको आर्थिक उन्नतिमा टेवा पुग्ने उल्लेख गर्दै किसानलाई प्रोत्साहन गर्ने कार्यक्रमलाई निरन्तरता दिनुपर्ने धारणा राखे ।
कार्यक्रममा विभिन्न सरकारी कार्यालयका प्रमुख, कृषि वैज्ञानिक, सुरक्षाकर्मी, जनप्रतिनिधि, कृषक तथा सरोकारवालाको उल्लेखनीय सहभागिता रहेको थियो । औपचारिक समारोहपछि सहभागीहरूले सामूहिक रूपमा धान रोपेर २३औँ राष्ट्रिय धान दिवस तथा रोपाइँ महोत्सव मनाएका थिए ।
