जिल्ला प्रहरी कार्यालय पर्साका प्रहरी प्रमुख प्रहरी उपरीक्षक (एसपी) पवन भट्टराईले मानवसेवा आश्रम वीरगञ्जको अवलोकन भ्रमण गरेका छन् ।
अवलोकनका क्रममा एसपी भट्टराईले आश्रममा आश्रित असहाय तथा बेसहारा आमाबुबाहरूको अवस्था, आश्रमले गर्दै आएको उद्धार, संरक्षण, उपचार तथा मानवसेवाका गतिविधिबारे जानकारी लिएका थिए। उनले आश्रममा आश्रित व्यक्तिहरूका लागि खाद्यान्न तथा भोजन सेवासमेत सहयोग गरेका थिए ।
सो अवसरमा नेपाल प्रहरीले मानवसेवा आश्रमका विभिन्न शाखामा २४ सै घण्टा एक जना सादा पोशाकका प्रहरी कर्मचारी परिचालन गरी सुरक्षा तथा आवश्यक समन्वयमा सहयोग गर्दै आएको जानकारी गराइएको थियो । आश्रममा आश्रित असहाय तथा बेसहारा नागरिकहरूको सुरक्षा र संरक्षणमा नेपाल प्रहरीले पुर्याउँदै आएको सहयोगप्रति मानवसेवा आश्रम परिवारले आभार व्यक्त गरेको छ ।
एसपी भट्टराईले आगामी दिनमा नेपाल प्रहरी तथा व्यक्तिगत तर्फबाट समेत मानवसेवा आश्रमलाई आवश्यक सहयोग र साथ प्रदान गर्ने प्रतिबद्धता व्यक्त गरे। उनले मानवसेवा जस्तो पवित्र अभियानमा राज्यका निकाय, सुरक्षा निकाय र समाजका सबै पक्षबीच सहकार्य आवश्यक रहेको बताए ।
कार्यक्रममा मानवसेवा आश्रम पर्साका संरक्षक तथा मधेश विश्वविद्यालयका उपकुलपति प्रा. डा. दीपक शाक्य, मानवसेवा आश्रम वीरगञ्ज अभिभावक परिवारका संयोजक एवं वीरगञ्ज उद्योग वाणिज्य संघका अध्यक्ष हरि गौतमलगायतको उपस्थिति रहेको थियो ।
कार्यक्रमको सहजीकरण मानवसेवा आश्रम वीरगञ्जका संस्थापक अभियन्ता देवेश गुप्ताले गरेका थिए । मानवसेवा आश्रमले सडकपेटी, सार्वजनिक स्थल तथा विभिन्न कठिन परिस्थितिमा रहेका असहाय, बेसहारा र परिवारबाट परित्यक्त व्यक्तिहरूको उद्धार गरी आश्रय, संरक्षण, उपचार तथा पारिवारिक पुनर्मिलनका लागि निरन्तर काम गर्दै आएको छ ।
