पुरुष भलिबलको बहुप्रतीक्षित फ्रेन्चाइज प्रतियोगिता नेपाल भलिबल लिग (एनभीएल) को पहिलो संस्करण आजदेखि काठमाडौंमा सुरु हुँदैछ । नेपाली भलिबललाई व्यावसायिक र फ्रेन्चाइज मोडलमा अघि बढाउने लक्ष्यसहित आयोजना हुन लागेको एनभीएलको पहिलो संस्करणमा ६ टोलीले प्रतिस्पर्धा गर्दैछन् ।
केडिया ग्रुपको आयोजनामा हुने लिगको उद्घाटन खेलमा आज सगरमाथा स्म्यासर्स र मधेश वारियर्स आमनेसामने हुँदैछन् । त्रिपुरेश्वरस्थित दशरथ रंगशाला कभर्डहलमा हुने खेल अपराह्न ४ बजे सुरु हुनेछ ।
पहिलो दिनको दोस्रो खेलमा अन्नपूर्ण स्पाइकर किंग्स र कर्णाली शिवराजबीच प्रतिस्पर्धा हुनेछ । उक्त खेल साँझ ७ बजे सुरु हुनेछ ।
लिगको पहिलो दिनको टिकट बिक्रीबाट संकलित सम्पूर्ण रकम बाढीपीडितको सहयोगका लागि प्रधानमन्त्री दैवी प्रकोप उद्धार कोषमा जम्मा गर्ने आयोजकले यसअघि नै घोषणा गरिसकेको छ ।
एनभीएलमा सहभागी ६ टोलीले सिंगल राउन्ड रोबिन प्रणालीमा एकअर्काविरुद्ध प्रतिस्पर्धा गर्नेछन् । लिग चरणको समाप्तिपछि शीर्ष स्थानमा रहने टोलीले सिधै फाइनलमा स्थान बनाउनेछ भने दोस्रो र तेस्रो स्थानमा रहने टोलीले फाइनल प्रवेशका लागि प्लेअफ खेल्नेछन् ।
एनभीएलको पहिलो संस्करणमा सगरमाथा स्म्यासर्स, मधेश वारियर्स, काठमाडौं रेड्स, अन्नपूर्ण स्पाइकर किंग्स, कर्णाली यशविस र खप्तड फाल्कन्स सुदूरपश्चिमले प्रतिस्पर्धा गर्नेछन् ।
सर्वाधिक पुरस्कार राशी
एनभीएलको विजेताले पाउने पुरस्कार रकम नेपाली भलिबल इतिहासमै सर्वाधिक पुरस्कार राशी रहेको छ । जसले गर्दा एनभीएलको पहिलो संस्करण अझ विशेष बन्ने निश्चित छ । एनभीएलको च्याम्पियन बन्ने टोलीले २० लाख रुपैयाँ नगद पुरस्कार प्राप्त गर्नेछ । आयोजकका अनुसार लिगको कुल पुरस्कार राशि ३२ लाख रुपैयाँ रहेको छ ।
बाँकी १२ लाख उपविजेता देखि विधागत अवार्ड र प्लेअर अफ म्याचको पुरस्कारमा छुट्याइएको पनि आयोजकले जनाएको छ ।
एनभीएलको विजेता टोली नेपाली भलिबल इतिहासमै सर्वाधिक नगद पुरस्कार प्राप्त गर्ने टिम बन्नेछ । जसका लागि अहिले ६ टोली होडमा छन् ।
१० देशका १८ विदेशी खेलाडी
नेपाल भलिबल लिगको पहिलो संस्करणमा विदेशको पनि चर्चित खेलाडीहरुको उपस्थिती हुनेछ । यसले एनभीएलललाई अन्तर्राष्ट्रिय रुपमा पनि फैलन सहयोग पुर्याउने विश्वास छ । प्रतियोगितामा १० देशका १८ विदेशी खेलाडी विभिन्न ६ फ्रेन्चाइज टोलीबाट खेल्दैछन् ।
यसअघि नेपालमा आयोजना हुने अधिकांश पुरुष भलिबल प्रतियोगितामा विदेशी खेलाडीका रूपमा भारत र पाकिस्तानका खेलाडीको उपस्थिति बढी हुने गरेको थियो । तर एनभीएमा छिमेकी देश मात्र नभएर एसियाकै मंगोलिया देखि इरानसम्म अनी युरोप देखि ब्राजिलसम्मको खेलाडी देखिनेछन् । विभिन्न देश र फरक खालको भलिबल संस्कृतिबाट १८ विदेशी खेलाडीहरुले नेपालको घरेलु कोर्टमा खेल्दैछन् ।
एनभीएलमा पाकिस्तानबाट सर्वाधिक पाँच खेलाडी सहभागी छन् भने भारत र मंगोलियाबाट तीन–तीन खेलाडी खेल्दैछन् ।
त्यसैगरी इरान, रुस, पोल्यान्ड, बेलारुस, सर्विया, ब्राजिल र बेनिनबाट एक–एक खेलाडीले एनभीएल खेल्न आएका छन् ।
नेपालमा आयोजना हुने पुरुष भलिबल प्रतियोगिताको इतिहासमा पहिलो पटक यति ठूलो संख्यामा विदेशी खेलाडी एउटै प्रतियोगितामा प्रतिस्पर्धा गर्न लागेका हुन् । यस्तै पुरुष भलिबलमा १० देशको खेलाडी जम्मा भएको पनि यो पहिलो पटक नै हो ।
यसले एनभीएललाई नेपाली खेलाडीका लागि अन्तर्राष्ट्रिय स्तरका खेलाडीसँग घरेलु कोर्टमै एक साथ प्रतिस्पर्धा गर्ने अवसर मिलेको छ ।
एनभीएलको नारा उचाईको नयाँ उडान भने जस्तै यस लिगले नेपालको पुरुष भलिबललाई व्यावसायिकतातर्फ नयाँ उचाइमा लैजाने र नेपाली भलिबलको स्तर विकासमा सहयोग पुग्ने आयोजकको अपेक्षा छ ।
घरेलु कोर्टमा नयाँ उत्साह
फ्रेन्चाइज टोली, खेलाडी अक्सनको माहोल, विदेशी खेलाडीको आगमन, आकर्षक पुरस्कारका कारण एनभीएलको पहिलो संस्करणलाई नेपाली भलिबल समर्थकले उत्सुकतापूर्वक प्रतीक्षा गरिरहेका छन् । त्यो प्रतिक्षाको समय अब सकिन लागेको छ ।
आजदेखि घरेलु कोर्टमा सुरु हुने एनभीएलको प्रतिस्पर्धाले नेपाली पुरुष भलिबलमा नयाँ अध्यायको सुरुवात समेत हुनेछ ।
नेपालको राष्ट्रिय टिमका खेलाडी देखि विदेशी खेलाडीहरुको जमघट रहेको यस लिगमा ट्यालेन्ट हन्टबाट आएका नयाँ प्रतिभावना खेलाडीहरु पनि छन् । उनीहरु पनि नाम चलेका खेलाडीसँग ड्रेसिङ रुम सयर गर्ने देखि कोर्टमा एक साथ उत्रनका लागि उत्साहित छन् ।
६ वटै फ्रेन्चाइज टोद्यीले ट्यालेन्ट हन्ट मार्फत १(१ खेलाडी ९१९ वर्षमुनीका० आफ्नो टिममा समावेश गरेका छन् । उनीहरुका लागि नेपाली र विदेशी खेलाडीसँग सिक्ने यो ठूलो अवसर बन्नेछ ।
