पर्साको पोखरिया नगरपालिकामा प्रमुख प्रशासकीय अधिकृतहरूको निरन्तर हेरफेर हुने क्रमले स्थानीय प्रशासनको स्थायित्वमाथि प्रश्न उठाएको छ ।
स्थानीय तहको निर्वाचनपछि २०७४ सालदेखि हालसम्म १९ जना प्रमुख प्रशासकीय अधिकृत परिवर्तन भएको विवरण सार्वजनिक भएसँगै प्रशासनिक नेतृत्व स्थिर हुन नसक्नुको कारणबारे चर्चा सुरु भएको छ ।
स्थानीय सरकार गठन भएको दुई कार्यकाल बित्न लाग्दासमेत नगरपालिकामा प्रशासनिक नेतृत्व स्थिर हुन सकेको छैन । उपलब्ध विवरणअनुसार प्रशासन सेवातर्फका नौ जना प्रमुख प्रशासकीय अधिकृत तीन महिनाभन्दा बढी जिम्मेवारीमा टिक्न सकेनन् । छोटो अवधिमै अधिकृतहरूको सरुवा हुने क्रमले नगरपालिकाको प्रशासनिक कार्यसम्पादन र सेवा प्रवाहमा समेत असर पार्न सक्ने देखिएको छ ।
अर्कोतर्फ, प्रशासन सेवाका अधिकृतहरू लामो समय टिक्न नसक्दा स्वास्थ्य, शिक्षा तथा पशु सेवातर्फका कर्मचारीले निमित्त प्रमुख प्रशासकीय अधिकृतको जिम्मेवारी सम्हाल्दै नगरपालिका सञ्चालन गरेको पाइएको छ । उनीहरूमध्ये केहीले छ महिनादेखि एक–दुई वर्षसम्म जिम्मेवारी सम्हालेका छन् । यसले प्रशासन सेवाका अधिकृतहरू छोटो समयमै बाहिरिनुपर्ने अवस्था किन सिर्जना भइरहेको छ भन्ने प्रश्न उठाएको छ ।
नगरपालिकामा प्रमुख प्रशासकीय अधिकृतहरूको बारम्बार सरुवा हुनुको वास्तविक कारण भने स्पष्ट हुन सकेको छैन । प्रशासन सेवाका अधिकृतहरूले जिम्मेवारीअनुसार काम गर्न नसकेका हुन् वा जनप्रतिनिधिबाट आवश्यक सहयोग र अनुकूल वातावरण नपाएका कारण टिक्न नसकेका हुन् भन्ने विषयमा स्पष्टता आउन सकेको छैन। त्यस्तै, कानुन र प्रशासनिक प्रक्रियाको पालना गर्ने क्रममा जनप्रतिनिधि र कर्मचारीबीच मतभेद उत्पन्न हुने गरेको हो कि भन्ने प्रश्नसमेत उठेको छ ।
प्रमुख प्रशासकीय अधिकृत स्थानीय तहको प्रशासनिक नेतृत्वसँगै आर्थिक प्रशासन, बजेट कार्यान्वयन, कर्मचारी व्यवस्थापन तथा विकास निर्माणका काममा महत्वपूर्ण जिम्मेवारीमा रहने पद हो। यस्तो पदमा बारम्बार नेतृत्व परिवर्तन हुँदा योजनाको निरन्तरता, निर्णय प्रक्रियाको प्रभावकारिता र नागरिकले पाउने सेवामा असर पर्न सक्छ ।
स्थानीय सरकार प्रभावकारी बनाउन जनप्रतिनिधि र कर्मचारीबीच विश्वास, सहकार्य तथा कानुनसम्मत कार्यसम्पादन आवश्यक हुन्छ। प्रशासनिक नेतृत्वलाई स्वतन्त्र र जिम्मेवार ढङ्गले काम गर्ने वातावरण उपलब्ध गराउनुका साथै कर्मचारीले पनि आफ्नो जिम्मेवारी इमानदारीपूर्वक निर्वाह गर्नुपर्ने हुन्छ ।
पोखरिया नगरपालिकामा प्रमुख प्रशासकीय अधिकृतहरू लामो समय टिक्न नसक्नुको कारण पहिचान गर्न सम्बन्धित जनप्रतिनिधि, कर्मचारी तथा सरोकारवाला निकायले गम्भीर समीक्षा गर्न आवश्यक देखिएको छ । बारम्बारको नेतृत्व परिवर्तनको वास्तविक कारण सार्वजनिक गर्दै प्रशासनिक स्थायित्व कायम गर्न नसके स्थानीय सरकारको कार्यक्षमता र नागरिकको विश्वासमाथि प्रश्न उठिरहनेछ ।
