जिल्ला अदालत सिरहाको परिसरबाट हतकडी फुत्काएर फरार भएका एक थुनुवा पक्राउ परेका छन् । पक्राउ पर्नेमा सिरहा नगरपालिका–१४ खिरौनाका १९ वर्षीय सतीश दास रहेका छन् ।
लागुऔषध (खैरो हेरोइन) सहित पक्राउ परेका दास प्रहरी हिरासतबाट अदालत लैजाने क्रममा फरार भएका थिए ।
जिल्ला प्रहरी कार्यालय सिरहाका अनुसार गत असोज २१ गते खैरो हेरोइनसहित पक्राउ परेका दासलाई असोज २२ गते जिल्ला अदालत सिरहाबाट २० दिनको म्याद थप गरी फर्काउने क्रममा अदालत परिसरबाट हतकडी फुत्काएर फरार भएका थिए ।
प्रहरी प्रवक्ता एवं प्रहरी नायब उपरीक्षक (डीएसपी) रमेशबहादुर पालका अनुसार दास फरार भएपछि प्रहरीले उनको खोजी तीव्र पारेको थियो ।
सोही क्रममा गएराति ११ बजेर ३५ मिनेटमा जिल्ला प्रहरी कार्यालय सिरहाबाट प्रहरी निरीक्षकको कमान्डमा खटिएको टोलीले नेपाल–भारत दशगजा क्षेत्रअन्तर्गत सिरहा नगरपालिका–१४ खिरौनाबाट उनलाई पक्राउ गरेको हो ।
पक्राउ परेका दासलाई जिल्ला प्रहरी कार्यालय सिरहामा ल्याइएको छ। घटनाबारे थप अनुसन्धान भइरहेको प्रहरीले जनाएको छ ।
