मोरङको रतुवामाईमा लागुऔषध कारोबारीलाई नियन्त्रणमा लिन प्रहरीले आठ राउण्ड गोली चलाएको छ। नेपाल–भारत सीमावर्ती क्षेत्र नजिकै प्रहरीले चलाएको गोली लागेर दुई जना घाइते भएका छन् भने पेस्तोल र करिब आधा किलो खैरो हेरोइनसहित तीन जना पक्राउ परेका छन् ।
मोरङ प्रहरीका प्रवक्ता तथा सूचना अधिकारी प्रहरी नायब उपरीक्षक (डीएसपी) मकेन्द्रकुमार मिश्रका अनुसार प्रहरीको गोली लागेर भारतको अररिया जिल्ला कुशाहाका २२ वर्षीय दीपककुमार बोसाक र कुटमुगन्जका ४० वर्षीय पुरन बोसाक घाइते भएका छन् । दुवै जनाको कोशी अस्पताल विराटनगरमा उपचार भइरहेको छ ।
उनीहरूसँगै रहेका मोरङको रतुवामाई नगरपालिका–१ चुनिमारीका ३५ वर्षीय प्रमोद ठाकुर पनि पक्राउ परेका छन् ।
प्रहरीका अनुसार लागुऔषध ओसारपसार भइरहेको विशेष सूचनाका आधारमा लागुऔषध नियन्त्रण ब्युरोको टोली परिचालन गरिएको थियो । बिहीबार राति करिब ९ः३० बजे रतुवामाई नगरपालिका–६ शनिश्चरेमा भारतीय नम्बर प्लेट बीआर ३७ भी ३९२६ को मोटरसाइकल र नम्बर नखुलेको अर्को मोटरसाइकलमा सवार तीन जनालाई प्रहरीले रोक्न खोजेको थियो ।
तर, प्रहरीलाई देखेपछि उनीहरू भाग्न खोजेपछि नियन्त्रणमा लिन प्रहरीले गोली चलाएको डीएसपी मिश्रले जानकारी दिए ।
प्रहरीले चाइनिज पेस्तोलबाट पाँच राउण्ड र ब्रेडा पेस्तोलबाट तीन राउण्ड गरी कुल आठ राउण्ड गोली प्रहार गरेको थियो । गोली लागेर घाइते भएका दुवै भारतीय नागरिकको घुँडामुनि चोट लागेको प्रहरीले जनाएको छ ।
पक्राउ परेकाहरूको साथबाट एक थान घरेलु पेस्तोल, त्यसमा लाग्ने एक राउण्ड गोली, करिब ५०० ग्राम खैरो हेरोइन र मोटरसाइकल बरामद गरिएको छ ।
प्रहरीका अनुसार पक्राउ परेको समूह लामो समयदेखि लागुऔषध कारोबारमा संलग्न रहँदै आएको थियो । घटनाबारे थप अनुसन्धान भइरहेको डीएसपी मिश्रले बताएका छन् ।
