रौतहटको देवाही गोनाही नगरपालिका–३ गोठटोलमा प्रेम विवाह गरेको दुई महिनामै एक नवविवाहिताको शंकास्पद मृत्यु भएको छ ।
मृतकका माइती पक्षले उनको हत्या गरी घटनालाई आत्महत्याको रूप दिन खोजिएको आरोप लगाएका छन् । देवाही गोनाही नगरपालिका–३ का २२ वर्षीय रौनक राज पटेलले गत असार १९ गते गरुडा नगरपालिका–७ पिपरिया निवासी १८ वर्षीया सुमेदी कुमारी पटेललाई परिवारको सहमतिबिना भगाएर प्रेम विवाह गरेका थिए ।
विवाहपछि सुमेदी रौनककै घरमा बस्दै आएकी थिइन् । विवाह भएको करिब दुई महिनामै उनको शंकास्पद अवस्थामा मृत्यु भएपछि घटनाले गम्भीर प्रश्न उठाएको छ । मृतकका माइती पक्षले सुमेदीको मृत्यु आत्महत्या नभई हत्या भएको दाबी गरेका छन् ।
उनीहरूले घटनालाई आत्महत्याजस्तो देखाउन खोजिएको आरोप लगाउँदै निष्पक्ष छानबिन गरी दोषीमाथि कडा कारबाहीको माग गरेका छन् । घटनाबारे प्रहरीले अनुसन्धान अघि बढाएको छ ।
मृत्युको वास्तविक कारण पोस्टमार्टम तथा अनुसन्धानबाट खुल्ने प्रहरीले जनाएको छ ।
