रौतहट । चोरी भएको मोटरसाइकल लिएर भारत पुगेका एक नेपाली नागरिक बिहारको मोतीहारी जिल्लाबाट पक्राउ परेका छन् ।
भारत–नेपाल सीमावर्ती क्षेत्रमा सवारीसाधन जाँच गर्ने क्रममा झरोखर थाना प्रहरीले शुक्रबार छितरौली गाउँनजिकबाट रौतहटको गुजरा नगरपालिका–बलुवा गाउँका २५ वर्षीय शेख कलीमुल्लाहलाई पक्राउ गरेको हो ।
भारतीय प्रहरीका अनुसार नियमित सवारीसाधन जाँचका क्रममा एचएचडी मेसिनमार्फत मोटरसाइकलको चेसिस नम्बर र दर्ता नम्बर परीक्षण गर्दा दुवैमा भिन्नता भेटिएको थियो। त्यसपछि मोटरसाइकलको थप विवरण रेकर्डसँग मिलान गर्दा उक्त मोटरसाइकल चोरीसम्बन्धी घटनामा पहिले नै दर्ता भएको खुलेको प्रहरीले जनाएको छ ।
प्रहरीका अनुसार मुजफ्फरपुरको सदर थाना काण्ड नम्बर ७९१/२१ मा उक्त मोटरसाइकल चोरीसम्बन्धी मुद्दा दर्ता रहेको थियो । सवारीसाधनको सत्यापनपछि मोटरसाइकल चोरीको भएको पुष्टि भएपछि कलीमुल्लाहलाई नियन्त्रणमा लिइएको भारतीय प्रहरीले जनाएको छ ।
सीमावर्ती क्षेत्रमा सवारीसाधनको नम्बर तथा चेसिस परिवर्तन गरी चोरीका मोटरसाइकल ओसारपसार हुने गरेको आशंकाबीच भएको यो पक्राउलाई प्रहरीले सीमा क्षेत्रमा बढाइएको निगरानीको परिणामका रूपमा लिएको छ ।
यद्यपि, पक्राउ परेका कलीमुल्लाहको चोरीको मोटरसाइकलमा संलग्नता तथा उक्त मोटरसाइकल कसरी उनको हातमा पुग्यो भन्ने विषयमा थप अनुसन्धान भइरहेको जनाइएको छ ।
भारतीय प्रहरीले कलीमुल्लाहमाथि आवश्यक अनुसन्धान तथा कानुनी प्रक्रिया अघि बढाएको जनाएको छ ।
