अमेरिकी राष्ट्रपति डोनाल्ड ट्रम्पले इरानसँग जारी युद्धमा अमेरिकाले विजय हासिल गरेपछि अन्तर्राष्ट्रिय तेल बजारमा ठूलो गिरावट आउने दाबी गरेका छन्। उनले युद्धपछि अमेरिकामा पेट्रोलको मूल्य प्रतिग्यालन २ अमेरिकी डलरभन्दा कम हुन सक्ने बताएका छन् ।मध्यपूर्वमा जारी सैन्य तनावका कारण ऊर्जा लागत बढेको उल्लेख गर्दै ट्रम्पले युद्ध समाप्त भएपछि बजारमा स्थिरता आउने दाबी गरेका हुन्। उनले इरानलाई आणविक हतियार विकास गर्न नदिने चेतावनीसमेत दिएका छन् ।
ट्रम्पको भनाइप्रति प्रतिक्रिया जनाउँदै इरानी संसद्का अध्यक्ष मोहम्मद बाघेर गालिबफले इरानको ऊर्जा पूर्वाधारमाथि आक्रमण नगर्न अमेरिकालाई चेतावनी दिएका छन्। उनले इरानको तेल तथा ग्यास क्षेत्रमा संलग्न अमेरिकी कम्पनीहरू समेत जोखिममा पर्न सक्ने बताएका छन् ।
यसैबीच, अमेरिकी युद्धमन्त्री पीट हेग्सेथले इरानले अमेरिकी जहाजमाथि आक्रमण गरे इरानी तेल ट्याङ्करलाई निशाना बनाउने चेतावनी दिएका छन्। उनले इरानसँग प्रभावकारी जल तथा वायुसेना नरहेको दाबी गर्दै अमेरिकी विमान, युद्धपोत र पनडुब्बीले इरानी सैन्य तथा तेल पूर्वाधारमा प्रहार गर्न सक्ने बताएका छन् ।
अमेरिकी सेन्ट्रल कमान्ड (सेन्टकम) ले तीनवटा इरानी कच्चा तेल ट्याङ्कर इरानी रिभोलुसनरी गार्ड्स (आईआरजिसी) तथा उसका क्षेत्रीय सहयोगीलाई आर्थिक सहयोग गर्ने अर्बौं डलरको ‘छाया सञ्जाल’को हिस्सा रहेको दाबी गरेको छ।मध्यपूर्वमा बढ्दो सैन्य तनावसँगै तेल आपूर्ति र विश्व बजारमा यसको सम्भावित प्रभावबारे चिन्ता बढिरहेका बेला अमेरिकी नेतृत्वबाट आएको पछिल्लो भनाइले ऊर्जा बजारमा थप चासो बढाएको छ ।
