स्पानिस क्लब रियल मड्रिडले युरोपेली च्याम्पियन्स लिग २०२६–२७ को आफ्नो पहिलो खेलमा इटालियन क्लब इन्टर मिलानलाई २–१ गोलले पराजित गर्दै विजयी सुरुवात गरेको छ ।
सान्तियागो बर्नाबेउमा मंगलबार राति भएको खेलमा रियलका लागि किलियन एमबाप्पे र फेडेरिको भाल्भेरडेले गोल गरे। इन्टरका लागि कार्लोस अगस्टोले एक गोल फर्काए l
खेलको १४औँ मिनेटमा ब्राहिम डियाजको पासमा एमबाप्पेले गोल गर्दै रियललाई अग्रता दिलाएका थिए। त्यसको नौ मिनेटपछि, २३औँ मिनेटमा भाल्भेरडेले गोल गर्दै रियलको अग्रता २–० मा पुर्याए ।
दोस्रो हाफमा इन्टरले खेलमा फर्कने प्रयास गर्दै आक्रमण तीव्र बनाएको थियो । त्यसक्रममा ७७औँ मिनेटमा कार्लोस अगस्टोले गोल गर्दै खेललाई २–१ को अवस्थामा पुर्याए। तर, बाँकी समयमा रियलले अग्रता जोगाउँदै च्याम्पियन्स लिगमा पहिलो तीन अंक हात पार्यो ।
यस खेलसँगै एमबाप्पेको च्याम्पियन्स लिग गोल संख्या ७१ पुगेको छ। उनी च्याम्पियन्स लिगको सर्वाधिक गोलकर्ताको सूचीमा रियल मड्रिडका पूर्व खेलाडी राउलसँगै संयुक्त रूपमा पाँचौँ स्थानमा पुगेका छन् ।
इन्टरले खेलको सुरुवातमा बलमाथि राम्रो नियन्त्रण राखे पनि रियलले पहिलो हाफमा प्राप्त अवसरलाई प्रभावकारी रूपमा उपयोग गरेको थियो। गोलरक्षक थिबो कोर्टुवाले पनि महत्वपूर्ण बचाउ गर्दै रियलको जित सुरक्षित गर्न योगदान दिए ।
