प्रधानमन्त्री बालेन्द्र शाहले निजगढ अन्तर्राष्ट्रिय विमानस्थलजस्ता राष्ट्रिय गौरव तथा रणनीतिक महत्वका ठूला पूर्वाधार आयोजनामा निजी क्षेत्रको लगानी भित्र्याउने विषयमा चासो देखाएका छन् ।
शुक्रबार नेपालका शीर्ष उद्योगपतिहरूसँग भएको छलफलमा प्रधानमन्त्री शाहले निजगढ अन्तर्राष्ट्रिय विमानस्थलसहित ठूला पूर्वाधार आयोजनामा निजी क्षेत्रको लगानी आकर्षित गर्ने विषयमा परामर्श गरेका हुन् । छलफलका क्रममा प्रधानमन्त्री शाहले निजगढ अन्तर्राष्ट्रिय विमानस्थल निजी क्षेत्रले निर्माण गर्न सक्ने वा नसक्ने विषयमा उद्योगीहरूसँग जिज्ञासा राखेका थिए । जवाफमा उद्योगीहरूले निजी क्षेत्र एकआपसमा सहकार्य गरेर यस्ता ठूला आयोजना निर्माण गर्न सक्षम रहेको बताएका थिए ।
ठूला पूर्वाधार आयोजनामा लगानी भित्र्याउन विद्यमान कानुनी व्यवस्था जटिल वा बाधक बनेको अवस्थामा आवश्यक संशोधन गरेर भए पनि सरकारले पूर्ण सहजीकरण गर्ने प्रतिबद्धता प्रधानमन्त्री शाहले व्यक्त गरेका छन् ।छलफलमा सहभागी आईएमई ग्रुपका अध्यक्ष चन्द्र ढकाल र गोल्यान ग्रुपका संस्थापक पवन गोल्यानले भेटघाट सकारात्मक र उत्साहजनक रहेको बताएका छन् ।
प्रधानमन्त्रीसँगको छलफलमा उद्योगी विनोद चौधरी, आईएमई ग्रुपका अध्यक्ष चन्द्र ढकाल, पूर्वराज्यमन्त्री उमेश श्रेष्ठ र गोल्यान ग्रुपका संस्थापक पवन गोल्यान सहभागी थिए ।
भिडियाे रिपाेर्ट
