पर्साको पोखरिया नगरपालिका–३ बसन्तपुरस्थित श्री नेपाल राष्ट्रिय प्राथमिक विद्यालयको भवन निर्माणका लागि ७६ लाख ५९ हजार ५ सय रुपैयाँ बराबरको सहयोग परियोजना स्वीकृत भएको छ।
लायन्स क्लब्स इन्टरनेसनल डिस्ट्रिक्ट ३२५ एसको प्रथम डिस्ट्रिक्ट क्याबिनेट बैठकले विद्यालय भवन निर्माणसम्बन्धी परियोजना स्वीकृत गर्ने निर्णय गरेको हो। परियोजना स्वीकृत भएको जानकारी लायन्स क्लब अफ पोखरियाका अध्यक्ष लायन नेजामुद्दीन शमानीले दिएका छन्।
शमानीको पहल, समन्वय र सक्रियतामा परियोजना अघि बढाइएको क्लबले जनाएको छ। ग्रामीण क्षेत्रका बालबालिकालाई सुरक्षित, व्यवस्थित र गुणस्तरीय शैक्षिक वातावरण उपलब्ध गराउने उद्देश्यले विद्यालय भवन निर्माण परियोजना अघि बढाइएको हो। परियोजना कार्यान्वयनपछि विद्यालयको भौतिक पूर्वाधारमा सुधार हुनुका साथै विद्यार्थीका लागि थप सुरक्षित र सहज अध्ययन वातावरण निर्माण हुने अपेक्षा गरिएको छ।
परियोजना स्वीकृतिका लागि पहल तथा समन्वय गरेको भन्दै लायन्स क्लब अफ पोखरियाले डिस्ट्रिक्ट ३२५ एसका अध्यक्ष लायन रामबिहारी पाण्डेयसहित सम्पूर्ण पदाधिकारी, सदस्य तथा सहयोगीहरूप्रति आभार व्यक्त गरेको छ। यसैबीच, कार्यक्रममा लायन्स क्लब अफ पोखरियाका अध्यक्ष नेजामुद्दीन शमानीलाई लायन्स क्लबको पिन लगाएर सम्मानसमेत गरिएको थियो। सम्मानपछि शमानीले आफूलाई प्रदान गरिएको माया, विश्वास र सम्मानले थप जिम्मेवारीबोध भएको बताउँदै सहयोग गर्ने सबैप्रति धन्यवाद तथा आभार व्यक्त गरेका छन्।
