नागार्जुन नगरपालिकाका नगरप्रमुख मोहनबहादुर बस्नेतविरुद्ध करिब ९ करोड रुपैयाँ भ्रष्टाचारको अभियोगमा विशेष अदालतमा मुद्दा दायर भएको छ । अख्तियार दुरुपयोग अनुसन्धान आयोगले स्रोत नखुलेको ८ करोड ६९ लाख ८७ हजार १०५ रुपैयाँ ६९ पैसा गैरकानुनी रूपमा आर्जन गरेको भन्दै मुद्दा दायर गरेको हो ।
आयभन्दा बढी खर्च
अख्तियारका अनुसार बस्नेत र उनका परिवारले जाँच अवधिमा १९ करोड ९५ लाख ७४ हजार ८६२ रुपैयाँ आर्जन गरेको देखिएको छ । तर, सोही अवधिमा २८ करोड ६५ लाख ६१ हजार ९६७ रुपैयाँ खर्च गरेको पाइएपछि आयभन्दा बढी खर्च गरेको प्रमाणित भएको अख्तियारको दाबी छ ।
भ्रष्टाचार निवारण ऐन अनुसार मुद्दा
भ्रष्टाचार निवारण ऐन, २०५९ को दफा २० को उपदफा (१) अनुसार बस्नेतले सार्वजनिक पदको दुरुपयोग गरी गैरकानुनी सम्पत्ति आर्जन गरेको ठहर गरिएको छ । अख्तियारले सोही बराबरको बिगो कायम गर्दै कैद सजाय र बिगो अनुसार जरिवाना माग गर्दै विशेष अदालतमा मुद्दा दायर गरेको हो ।
साथै, लुकाइछिपाइ राखिएको सम्पत्ति जफत गर्नका लागि बस्नेतकी श्रीमती उर्मिला बस्नेतलाई समेत प्रतिवादी कायम गरिएको छ। बस्नेत नेपाली कांग्रेसबाट निर्वाचित नगरप्रमुख हुन् ।
