सर्लाहीसहित मधेशका विभिन्न जिल्लामा असोजमै बाक्लो हुस्सु लाग्न थालेको छ। मङ्सिर–पुसमा देखिने जस्तै बाक्लो हुस्सु असोजमै लागेपछि मधेशको मौसममा असामान्य परिवर्तन देखिएको स्थानीयले बताएका छन् ।
बुधबार बिहानैदेखि सर्लाहीको मलङ्गवासहित दक्षिणी भेगमा नजिकैको दृश्यसमेत नदेखिने गरी बाक्लो हुस्सु लागेको थियो। भारी वर्षा रोकिएलगत्तै हुस्सु लाग्न थालेको मलङ्गवा नगरपालिका–८ का स्थानीय शिवचन्द्र चौधरीले बताउनुभयो ।
चौधरीका अनुसार यसअघि यस्तो बाक्लो हुस्सु मङ्सिर–पुसमा देखिने गरे पनि यस वर्ष मध्य असोजमै देखिएपछि स्थानीय आश्चर्यमा परेका छन् ।
सर्लाहीको चुरे क्षेत्रमा भने बिहान पातलो हुस्सु लागे पनि पछि हटेर घाम लागेको स्थानीयले बताएका छन्। लालबन्दी नगरपालिका–१५ का वडाध्यक्ष गोरखबहादुर बलका अनुसार उत्तरी भेगको मौसम बिहानपछि खुलेको थियो ।
मधेशका दक्षिणी क्षेत्रमा बिहान बाक्लो हुस्सुसँगै शीत पर्ने गरेको छ भने दिउँसो चर्को घाम लाग्दा गर्मी महसुस हुने गरेको छ। रातको समयमा भने चिसो बढ्न थालेको स्थानीयको भनाइ छ ।
मौसममा आएको परिवर्तनसँगै रुघाखोकी, ज्वरो लगायतका स्वास्थ्य समस्या देखिन सक्ने चिकित्सकले बताएका छन्। डा. गुणेश्वर झाले विशेषगरी बालबालिका तथा शारीरिक अवस्था कमजोर भएका व्यक्तिले मौसम परिवर्तनका बेला सावधानी अपनाउन सुझाव दिनुभएको छ ।
यसैबीच, बाक्लो हुस्सुका कारण पूर्व–पश्चिम महेन्द्र राजमार्ग, हुलाकी सडकसहित दक्षिणी भेगका सडकमा सवारीसाधनले बत्ती बालेर यात्रा गरिरहेका छन्। जिल्ला ट्राफिक प्रहरी कार्यालय, सर्लाहीले हुस्सुका कारण दृश्यता कम हुने भएकाले दुर्घटनाको जोखिम बढ्न सक्ने भन्दै चालकलाई सावधानीपूर्वक सवारी चलाउन आग्रह गरेको छ ।
