सिरहाको कर्जन्हामा टिपर र यात्रुवाहक विद्युतीय गाडी (ईभी) आपसमा ठोक्किँदा एक महिलाको मृत्यु भएको छ भने पाँच जना घाइते भएका छन् । शुक्रबार भएको दुर्घटनामा घाइतेमध्ये दुई जनाको अवस्था गम्भीर रहेको प्रहरीले जनाएको छ ।
पूर्वपश्चिम महेन्द्र राजमार्गअन्तर्गत कर्जन्हा नगरपालिका–४ भुल्केमा दुर्घटना भएको हो । पूर्वबाट पश्चिमतर्फ जाँदै गरेको म.प्र.०१–००१ ज. ०१२४ नम्बरको ईभीलाई विपरीत दिशाबाट आउँदै गरेको म.प्र.०३–००२ ख. ३९९६ नम्बरको टिपरले ठक्कर दिएको प्रहरीले जनाएको छ ।
दुर्घटनामा गोलबजार नगरपालिका–४ की करिब ४५ वर्षीया शोभा कुमारी यादव गम्भीर घाइते भएकी थिइन् । टाउको तथा अनुहारमा चोट लागेपछि उनलाई कर्जन्हास्थित फूलकुमारी महतो मेमोरियल अस्पतालमा उपचारका लागि लगिएको थियो । उपचारकै क्रममा उनको मृत्यु भएको जिल्ला प्रहरी कार्यालय सिरहाका सूचना अधिकारी डीएसपी रमेशबहादुर पालले जानकारी दिए ।
मृतक यादवको शव पोस्टमार्टमका लागि प्रादेशिक अस्पताल सिरहामा राखिएको प्रहरीले जनाएको छ ।
दुर्घटनामा गम्भीर घाइते २२ वर्षीया प्रियंका यादवलाई थप उपचारका लागि हेलिकोप्टरबाट काठमाडौंस्थित मेडिसिटी अस्पताल लगिएको छ । गोलबजार नगरपालिका–६ की ४५ वर्षीया ललिता महतोलाई पनि थप उपचारका लागि विराटनगर पठाइएको प्रहरीले जनाएको छ ।
ईभी चालक धनगढीमाई नगरपालिका–२ का ३५ वर्षीय मन्जुर खान, गोलबजार–४ की संगीता मण्डल र फुलकुमारी यादवको अवस्था मध्यम रहेको प्रहरीले जनाएको छ । उनीहरूको कर्जन्हास्थित फूलकुमारी महतो मेमोरियल अस्पतालमा उपचार भइरहेको छ ।
दुर्घटनामा परेका सबैजना जितिया पर्वका व्रतालु रहेको पारिवारिक स्रोतले जनाएको छ । जितियाको अवसरमा नुहाएर खाने दिन भएकाले उनीहरू कमला नदीमा स्नान गर्न जाँदै गरेको बताइएको छ ।
दुर्घटनापछि टिपर चालक र टिपरलाई प्रहरीले नियन्त्रणमा लिएको छ । घटनाबारे थप अनुसन्धान भइरहेको जिल्ला प्रहरी कार्यालय सिरहाले जनाएको छ ।
