भोजपुरी गायक मनी सिंहको स्वर, शब्द र संगीतमा सजिएको नयाँ भक्ति गीत ‘गहवा माई के जब होला सिंगार’ औपचारिक रूपमा सार्वजनिक भएको छ ।
वीरगंजस्थित प्रसिद्ध धार्मिकस्थल गहवा माई मन्दिरको धार्मिक तथा सांस्कृतिक महिमा र भक्तिभावलाई केन्द्रमा राखिएको गीत ‘Money Singh Official’ युट्युब च्यानलमार्फत सार्वजनिक गरिएको हो । गहवा माईप्रतिको आस्था, भक्तजनको श्रद्धा तथा मन्दिरको भक्तिमय वातावरणलाई गीतमार्फत प्रस्तुत गरिएको निर्माण पक्षले जनाएको छ । विशेषगरी बिहानको आरती, मन्दिरमा हुने पूजाआजा, दर्शन तथा गहवा माईको जयजयकारलाई गीत र भिडियोमा समेटिएको छ।
गीतमा शब्द रचना तथा संगीत स्वयं गायक मनी सिंहले गरेका छन्। गीतको संगीत, मिक्सिङ अनुराग राजाले गरेका छन् । भोजपुरी भाषाको मौलिक स्वादसँगै धार्मिक भावनालाई जोडेर तयार पारिएको गीतले गहवा माईप्रतिको श्रद्धालाई संगीतको माध्यमबाट प्रस्तुत गर्ने प्रयास गरेको छ।
गीतको भिडियो घनश्याम कुशवाहको निर्देशनमा तयार पारिएको हो । भिडियोमा सुदीप साह र आर्या यादव मुख्य भूमिकामा छन् । भिडियोमा गहवा माई मन्दिरको धार्मिक परिवेश, दर्शनका लागि आउने भक्तजन तथा भक्तिमय वातावरणलाई दृश्यात्मक रूपमा प्रस्तुत गरिएको छ।
गहवा माई मन्दिर वीरगंजको धार्मिक पहिचानसँग जोडिएको महत्वपूर्ण स्थलका रूपमा परिचित छ। विशेषगरी विभिन्न पर्व तथा धार्मिक अवसरमा यहाँ ठूलो संख्यामा श्रद्धालु पुग्ने गरेका छन् । स्थानीय धार्मिक आस्था र भोजपुरी सांस्कृतिक परिवेशलाई गीतमार्फत प्रस्तुत गरिएकाले नयाँ गीतले स्थानीय श्रोता तथा भोजपुरी संगीतप्रेमीबीच आकर्षण बढाउने अपेक्षा गरिएको छ ।
भिडियाे रिपाेर्ट
