पर्साको जगरनाथपुर गाउँपालिका–२ स्थित दसौता–इनर्वा नाकामा भारतीय नम्बर प्लेटका चारपाङ्ग्रे सवारीसाधनको आवतजावतमा कडाइ गरिएपछि स्थानीय बासिन्दा आन्दोलित भएका छन्।
स्थानीयले सडक अवरुद्ध गर्दै चक्काजामसहित प्रदर्शन गरेका हुन्। भारतीय सवारीसाधनलाई नाकाबाट प्रवेशमा रोक लगाएपछि दैनिक आवतजावत तथा अत्यावश्यक काम प्रभावित भएको भन्दै स्थानीयले विरोध जनाएका छन्।
स्थानीयले भिस्वा नाकामा जस्तै दसौता नाकाबाट पनि भारतीय चारपाङ्ग्रे सवारीसाधनलाई सहज प्रवेशको व्यवस्था गर्न माग गरेका छन्।
प्रदर्शनपछि घटनास्थल पुगेका सशस्त्र प्रहरी बल पर्साका प्रहरी उपरीक्षक मोहनबहादुर क्षेत्रीले स्थानीयसँग छलफल गर्दै समस्या र माग समेटेर जिल्ला प्रशासन कार्यालयमा ज्ञापनपत्र बुझाउन आग्रह गरेका थिए। सुरक्षा निकायबाट सहजीकरणको आश्वासन पाएपछि स्थानीयले तत्कालका लागि चक्काजाम स्थगित गरेका छन्।
स्थानीयले सोमबार वीरगंजस्थित जिल्ला प्रशासन कार्यालय पुगेर प्रमुख जिल्ला अधिकारीसमक्ष ज्ञापनपत्र बुझाउने तयारी गरेका छन्।
सप्रउ क्षेत्रीका अनुसार एम्बुलेन्स, शववाहन तथा विवाहका सवारीसाधनलाई आवश्यकताअनुसार आवतजावतमा सहजीकरण हुँदै आएको छ। तर अनुमतिविना पर्यटन तथा घुमफिरका लागि आउने भारतीय सवारीसाधनलाई भने तोकिएका मुख्य नाकाबाट आवश्यक प्रक्रिया पूरा गरेर मात्र प्रवेश गर्न दिइने गरिएको छ।
हाल पर्सामा वीरगंज, ठोरी र भिस्वा नाकाबाहेक अन्य साना नाकाबाट भारतीय चारपाङ्ग्रे सवारीसाधनको औपचारिक प्रवेशका लागि कानुनी व्यवस्था नरहेको सुरक्षा निकायले जनाएको छ।
भारतीय चारपाङ्ग्रे सवारीसाधनको प्रवेशमा कडाइ भएपछि पर्साको दसौता–इनर्वा नाकामा स्थानीयले चक्काजामसहित प्रदर्शन गरेका छन्। सुरक्षा निकायसँगको छलफलपछि आन्दोलन स्थगित गर्दै स्थानीयले सोमबार जिल्ला प्रशासनमा ज्ञापनपत्र बुझाउने भएका छन्।
