सप्तरीको कञ्चनरूप नगरपालिका–९ रघुनाथपुरका ३८ वर्षीय मोहम्मद बसिरको विषालु करेत सर्पको टोकाइबाट मृत्यु भएपछि उनको परिवार गम्भीर संकटमा परेको छ। कमाउने मुख्य सदस्य गुमेपछि श्रीमतीसहित उनका छ जना नाबालक सन्तानको भविष्य अन्योलमा परेको हो।
करिब आठ दिनअघि राति परिवारका सबै सदस्य सुतिरहेका बेला बसिरलाई करेत सर्पले टोकेको थियो। सर्पले टोकेको थाहा पाएपछि उपचारका लागि अस्पताल लैजान मोटरसाइकल खोज्दाखोज्दै करिब आधा घण्टा बितेको परिवारले जनाएको छ। करिब सात किलोमिटर टाढाको कञ्चनपुर अस्पताल पुर्याउँदा बसिरको बाटोमै मृत्यु भइसकेको थियो।
बसिरकी श्रीमती ३२ वर्षीया खैरुल खातुनका अनुसार बसिरलाई सुतिरहेको अवस्थामा पिठ्युँमा सर्पले टोकेको थियो। परिवारको जीविकोपार्जनका लागि बसिर अर्काको घर तथा खेतबारीमा मजदुरी गर्दै आएका थिए।
बसिरको मृत्यु भएपछि खैरुलसहित १५ वर्षीया आसमा, १३ वर्षीया मरियम, ११ वर्षीया नाजो, ८ वर्षीया इलिना, ६ वर्षीया फतमा र ४ वर्षीय छोरा बेसहारा भएका छन्। ऐलानी जग्गामा टिनको छानो भएको सानो घरमा बस्दै आएको परिवारलाई अहिले दैनिक दुई छाक खानसमेत समस्या भएको छ।
बाबुको मृत्यु भएपछि छोराछोरीको पढाइ रोकियो
आर्थिक अवस्था कमजोर भएपछि बसिरका सबै छ जना सन्तानले पढाइ छाडेका छन्। उनीहरू स्थानीय मदरसामा अध्ययन गर्दै आएका थिए। तर परिवारको आम्दानीको स्रोत गुमेपछि अहिले शिक्षाभन्दा दैनिक खानाको जोहो गर्नु ठूलो चुनौती बनेको खैरुल बताउँछिन्।
“अब छ जना बच्चालाई पाल्ने र पढाउने जिम्मेवारी मेरो काँधमा आएको छ,” खैरुलले दुःख व्यक्त गर्दै भनिन्, “मजदुरी गरेर परिवार चलाउन कति सम्भव हुन्छ, थाहा छैन।”
सहयोग जुटाउन पहल
परिवारको अवस्थाबारे जानकारी पाएपछि स्थानीय समाजसेवी मोहम्मद उमरले सहयोगका लागि पहल गरेका छन्। उनको पहलमा विराटनगरस्थित पारस अस्पतालले करिब तीन महिनालाई पुग्ने खाद्यान्न सामग्री परिवारलाई उपलब्ध गराएको छ।
अस्पतालका डा। मोहम्मद सफिउर रहमानको नेतृत्वमा पुगेको टोलीले परिवारको घरमै पुगेर खाद्यान्न हस्तान्तरण गरेको हो। साथै परिवारका सदस्य बिरामी परेमा पाँच वर्षसम्म अस्पतालमा निःशुल्क उपचार उपलब्ध गराउने घोषणा गरिएको छ।
तर तत्कालका लागि प्राप्त सहयोगले केही राहत मिले पनि परिवारको दीर्घकालीन समस्या समाधान भएको छैन। श्रीमान्को मृत्युको पीडासँगै छ जना सन्तानको पालनपोषण, शिक्षा र भविष्य सुरक्षित गर्ने जिम्मेवारी खैरुलका लागि ठूलो चुनौती बनेको छ।
