सर्लाहीको कबिलासी नगरपालिका–३ मदनपुरमा मोटरसाइकल दुर्घटनामा परेका एक युवक पेस्तोलसहित पक्राउ परेका छन् ।
प्रहरीका अनुसार आज बिहान करिब १ बजे जनकपुरबाट मदनपुरस्थित घरतर्फ जाँदै गरेको मोटरसाइकल आफैं अनियन्त्रित भई दुर्घटनामा परेको थियो। दुर्घटनामा मदनपुरका ३३ वर्षीय तुलसी ठाकुर घाइते भएका थिए ।
दुर्घटनापछि उनको साथमा पेस्तोल फेला परेको प्रहरीले जनाएको छ। पेस्तोल भेटिएपछि ठाकुरलाई नियन्त्रणमा लिइएको हो ।
दुर्घटनाका क्रममा ठाकुरको दाहिने गाला र बायाँ हातमा सामान्य चोट लागेको बताइएको छ। उनलाई नियन्त्रणमा लिएर पेस्तोलको स्रोत तथा घटनाबारे थप अनुसन्धान भइरहेको प्रहरीले जनाएको छ ।
