पर्साको इलाका प्रहरी कार्यालय पटेर्वा सुगौलीमा नयाँ प्रहरी निरीक्षक (इन्सपेक्टर)का रूपमा विपन कार्की आउने भएका छन्।
नेपाल प्रहरी प्रधान कार्यालय, मानवस्रोत विकास विभाग, प्रशासन शाखा, नक्सालको पत्रादेशअनुसार कार्कीलाई पटेर्वा सुगौलीमा काजमा खटाइएको हो । कार्की यसअघि नेपाल प्रहरी केन्द्रीय विशेष कार्यदल, रिजर्भ, काठमाडौंमा दरबन्दी रही नगर प्रहरीमा कार्यरत थिए । अब उनले इलाका प्रहरी कार्यालय पटेर्वा सुगौलीको प्रमुखका रूपमा जिम्मेवारी सम्हाल्ने तयारी गरेका छन् ।
पटेर्वा सुगौलीमा नयाँ प्रहरी निरीक्षक पठाउने निर्णय यसअघि कार्यरत प्रहरी निरीक्षक समुन्नत अधिकारीसहित तीन प्रहरी कर्मचारीमाथि छानबिन भइरहेका बेला भएको हो ।
इलाका प्रहरी कार्यालय पटेर्वा सुगौलीमा कार्यरत प्रहरी निरीक्षक समुन्नत अधिकारी, प्रहरी हवल्दार दीपक राउत र प्रहरी जवान पपु पण्डितमाथि लागुऔषध मुद्दाका फरार अभियुक्त बाबु–छोरालाई पक्राउ गरी १० हजार रुपैयाँ लिएर छाडेको आरोप लागेको छ।
जिल्ला प्रहरी कार्यालय पर्साका अनुसार घटनाबारे गुनासो प्राप्त भएपछि प्रारम्भिक अनुसन्धान गरिएको थियो । अनुसन्धानका क्रममा तीनै प्रहरी कर्मचारीको सम्भावित संलग्नताबारे आशंका देखिएपछि उनीहरूलाई कार्यक्षेत्रबाट फिर्ता बोलाएर जिल्ला प्रहरी कार्यालयमा झिकाइएको हो।
प्रहरीले आरोपमा उल्लेख गरिएको घुस रकमसमेत फेला परेको जनाएको छ। यद्यपि घटनामा उनीहरूको वास्तविक संलग्नता र आरोपको तथ्यबारे विस्तृत छानबिनपछि मात्रै निष्कर्षमा पुगिने प्रहरीले जनाएको छ।
घटनाको विस्तृत अनुसन्धानका लागि प्रहरी नायब उपरीक्षक (डीएसपी) राजु कार्कीको नेतृत्वमा चार सदस्यीय छानबिन समिति गठन गरिएको छ। समितिले रकम लेनदेन, अभियुक्तलाई पक्राउ गरी छाडिएको घटनालगायतका विषयमा अनुसन्धान गरिरहेको छ।
छानबिन पूरा भएपछि समितिले तयार गर्ने प्रतिवेदन प्रहरी प्रधान कार्यालयमा पठाइनेछ। अनुसन्धानबाट दोषी देखिएमा सम्बन्धित प्रहरी कर्मचारीमाथि थप कारबाहीका लागि सिफारिस गरिने जिल्ला प्रहरी कार्यालय पर्साले जनाएको छ।
जिल्ला प्रहरी कार्यालय पर्साका प्रहरी नायब उपरीक्षक एवं प्रवक्ता चक्रबहादुर मल्लले गुनासो प्राप्त भएपछि सम्बन्धित प्रहरी कर्मचारीलाई सोधपुछ तथा अनुसन्धानका लागि जिल्ला बोलाइएको जानकारी दिएका छन्।
नयाँ प्रहरी निरीक्षक कार्कीले जिम्मेवारी सम्हालेसँगै पटेर्वा सुगौली क्षेत्रमा शान्ति–सुरक्षा, लागुऔषध नियन्त्रण, सीमा क्षेत्रको निगरानी तथा आपराधिक गतिविधि नियन्त्रणमा प्रहरीको भूमिका कस्तो रहने भन्ने विषयमा स्थानीयस्तरमा चासो बढेको छ।
भिडियाे रिपाेर्ट
